NunaMinerals
Nunamineralsip akiliisinnaajunnaartutut nalunaarutiginissaanik Ole Christiansen piumasaqartuuvoq
Nunamineralsip akiliisinnaajunnaartutut nalunaarutigineqarnissaanik kingullermi piumasaqartuuvoq selskabip pisortarisimasaa Ole Christiansen. Selskabi børsimut nalunaaruteqarnermini taamatut paasissutissiivoq
Nunaminerals tallimanngormat Kalaallit Nunaata Eqqartuussisuuneqarfiani akiliisinnaajunnaartutut nalunaarutigineqarpoq. Nunamineralsip siusinnerusukkut akiliisinnaajunnaartutut nalunaarutigineqarnissani marloriarluni pinngitsoortittarsimavaa, pingajussaali tassa iluatsinngilaq.
Aalajangiinerup eqqartuussivimmut qaffasinnerusumut ingerlateqqinnissaanut maanna ullunik 14-inik piffissaqarput.
Nunaminerals naatsumik tusagassiorfinnut nalunaarutikkut paasissutissiivoq siulittaasup Chris Williamsip pisimasoq allakkatigut oqaaseqarfigiumaaraa, taannalu aqagu marlunngornermi juulip 5-anni, selskabip nittartataatigut tamanut saqqummiunneqarumaartoq.
KNR-p paasissutissiissutigaa ingerlatsiviit angisuut mikisullu 40-t inuillu ataasiakkaat Nunamineralsimi 40 millioner koruunit missaannik pissaqartut. KNR-p paasisai naapertorlugit Ole Christiansen 2,7 millioner koruunit missaannik pissaqarpoq.
Sermitsiaq.AG-p Ole Christiansen oqaaseqartissinnaasimanngilaa, taannali KNR-mut oqarsimavoq nammineq akissarsiassani pineqanngitsut, selskabilli akileraanerminik sivisuumik uninngatitsisimanerata naammassineqarnissaa pineqartoq.
– Aningaasat pineqanngillat. Uannut alla pineqarpoq. Innarlerneqarsinnaanera illersorniarlugu taamaasiorpunga, Ole Christiansen KNR-mut oqarpoq.