misissuineq
Nunamineralsip ajornartorsiortup siunissartik saqqummiuppaat
Tuluit suliffeqarfiutaata GMM-ip suliffeqarfik tigussallugu kissaatigaa. Namminersorlutik Oqartussat akuersaarput, pingasunilli piumasaqarput
Namminersorlutik Oqartussanit suliffeqarfik aatsitassanik ujaasisartoq ilaatigut pigineqartoq Nunaminerals, maajimili akilersuiunnaarnikoq, maanna iluarsaqqinnissamut periarfissat saqqummiussivoq.
GMM tigusissaaq
Suliffeqarfiup ukiumoortumik 2014-imut nalunaarusiaani saqqummiunneqaqqammertumi takuneqarsinnaavoq, tuluit suliffeqarfiutaata GMM-ip aatsitassanik ujaasinermut suliaqartup piginneqataassutip annerpaartaa tigorusullugu kissaateqartoq, taamatullu suliffeqarfiup ingerlaneranik.
Atuaruk: NunaMineralsimik annaassiniaralualersoq
Ingerlatsineq akilereeraa
GMM tulummik Patrick Newmannimik aningaasaliisumik siuttulik immikkut ittumik januarimi ataatsimeersuartoqarnerata kingorna suliffeqarfik ajornartorsiortoq iluarsiniarsaraa. Akilersuiunnaanerullu kingorna GMM 1,5 millionit koruunit sinnerlugit Nunamineralsip ingerlanneqarneranut akileereersimavoq, ilaatigut ukiumoortumik nalunaarut piareersinnaanissaa qulakkeerniarlugu.
Namminersorlutik Oqartussat akuersaartut
Nalunaarusiami aamma takuneqarsinnaavoq, illuatungeriit suli isumaqatigiinniartut, aammalu suli isumaqatigiissuteqartoqanngitsoq. Tassanilu Namminersorlutik Oqartussat pingaarutilittut inissisimavoq, tassami suliffeqarfiutini Greenland Holding peqatigalugu katillugu 10,5 millionit koruuninik Nunamineralsimut taarsigassarsititsinikuuvoq.
Taarsigassat januarip 31-iani akilereersimasussaagaluarput, tamannalu suliffeqarfiup ajornartorsiortut naammassisinnaasimanngilaa.
Atuaruk: Pisortaaneq Ole Christiansen Nunamineralsimit tunuarpoq
Piumasaqaatit pingasut
Suliffeqarfiup iluarsartuunneqarnissaanut tunngasumi isumaqatigiissummi Namminersorlutik Oqartussat akuersaarnerat nalunaarusiami ersippoq. Tamannali aatsaat Nunamineralsip bestyrelsiata aamma GMM-ip inaarutaasumik isumaqatigiissinnaagunik pisinnaavoq, Naalakkersuisullu isumaqatigiissut akuerippassuk, kiisalu Aatsitassanut Ikummatissanullu Aqutsisoqarfiup Nunamineralsip nutaanik piginnittoqalernera akuersaarpassuk.
Ukiut pingasut
Iluarsartuussineq piviusunngussappat, GMM siullermik Nunamineralsimut 10 millionit koruuninik aningaasaliiniarpoq aamma aningaasaleeqqinnissaq qulakkeerlugu, ingerlatsineq aamma aatsitassanik ujaarlerneq ukiuni pingasuni qulakkeerlugit.
Aammattaaq pingaaruteqarpoq, Nunamineralsip aktiaataat Københavns Fondsbørsenimi Nasdaq OMX Copenhagenimi niuerutaaleqqinnissaat. Suliffeqarfiup ajornartorsiornera peqqutigalugu, niuerneq februaarip 20-anili unitsinneqarpoq.
Saniatigut aamma GMM neqerooruteqarpoq, Nunamineralsimi aningaasanik pisassallik akilerniarlugit. Tamanna ataasiarnermi imaluunniit ukiut pingasut ingerlanerini pisinnaasoq, ukiumoortumik nalunaarusiami takuneqarsinnaavoq.
Amigartoorutit 87 millionit koruunit
Nunaminerals ukiumi naatsorsuiffiusumi 2014-imi akileraarutit akilereerlugit 87 millionit koruuninik amigartoorpoq, ukiup siuliani 60,1 millionit koruuniupput.
2014-imi amigartoorutit suliffeqarfiup kvartalip pingajuanni 2014-mut naatsorsuussanut attuumassuteqarput.
Amigartoorutit amerleriarnerujussuat immikkut ittumik nalikillisoqarneranik peqquteqartoq, nalunaarummi takuneqarsinnaavoq.
Nunaminerals negativiusumik 10 millionit koruuninik nammineq aningaasaateqarpoq, katillugulu 28,9 millionit koruuninik akiligassaqartoq nalunaarusiami ersippoq.
Atuaruk: NunaMineralsimik annaassiniaralualersoq