Nunaminerals ajornartorsiortoq

Nunaminerals nutaamik piffissalerneqarpoq

Eqqartuussivimmi ataatsimeeqatigiittoqarnerani aatsitassarsioqatigiiffiup ajornartorsiortup annaassiniarnissamut pilersaarutip inissinnissaanut nutaamik piffissalerneqarnissaa akiligassaqarfinnit akuersissutigineqarpoq

Nunamineralsip pisortaa Ole Christiansen, assi toqqorsivimmeersoq

Pigisanik agguaassisarnermut eqqartuussivik Kalaallit Nunaanni Eqqartuussivinniitoq ataatsimeeqatigiittoqarnerani akiliioraanermik unitsitsisimanerup juulip 17-iata tungaanut sivitsorneqarnissaanik aalajangerpoq.

Nunaminerals fondsbørsimut nalunaarummi taama ilisimatitsivoq.

Suliffeqarfik Namminersorlutik Oqartussanit piginneqataaffigineqartoq akiliioraanerminik maajip 15-ianiit unitsitsivoq. Eqqartuussivimmilu juunip 5-ani ataatsimiinneq tassaavoq piffissamik sivitsuiffiusoq siulleq. Akiliioraanermik unitsitsineq suliffeqarfimmut nalinginnaasumik pitsaasuusanngilaq. Nunamineralsimulli aalajangerneq tamanna suliffeqarfiup tamatumuunaagallartoq akiliisinnaajunnaarnissamik pinngitsuuuineranik isumaqarpoq.

Annaassiniarnissamut pilersaarummut siunnersuut nutaaq

Akiliioraanermik unitsitsinerup sivitsorneqarnissaata tunngavissaqarneranut suna pissutaarpiarsimanersoq suli paasinarsinngilaq. Nunamineralsili siusinnerusukkut ilisimatitsivoq, suliffeqarfik Tuluit Nunaanneersoq Greenland Mining Management (GMM) aningaasaliisartoq Patrick Newmann siuttoralugu annaassiniarnissamut pilersaarummut nutaamik siunnersuuteqarsimasoq. Siunnersuut taanna suliami maanna qitiusumik inissisimalerpoq.

Atuaruk: Nunamineralsip akiliisinnaajunnaarnissamik qinnuteqaatini utertippaa

Aatsitassarsioqatigiiffiup ajornartorsiornini qaangerluarsinnaassappagu ilaatigut ilusilersueqqinnissamut atatillugu piumasaqaatinik inaarutaasunik GMM-ip Nunamineralsillu siulersuisuisa isumaqatigiissuteqarsinnaanissaat, ilaatigullu suliffeqarfiup akiligassaqarfiisa pilersaarusiamut aamma tapersiinissaat, piumasaqaataavoq.

Tamatumanilu suliffeqarfik Namminersorlutik Oqartussanit pigineqartoq, Greenland Holding, akiligassaqarfiit angisuut akornanniittoq, pingaarutilimmik inissisimaffeqartutut ilimagineqarpoq.

Nunaminerals akiliioraanermik unitsitsigallarsimanerup nalaani nakkutigineqarpoq. Nakkutilliisunit akiligassaqarfiit soqutigisaat isumagineqarput. Nakkutilliisullu taamaattumik suliffeqarfimmik aalajangiussanik pingaarutilinnik tamanik akuersissutiginnittussaapput.

Atuaruk: Kim Kielsen Nunaminerals pillugu: Annannissartik qulakkeersimanngilaat

Powered by Labrador CMS