Nunami timmisartukkut angalasinnaaneq, nujaleriffiit neriniartarfiillu ammariaannanngorput

Arfininngorpat ullaakkut arfineq-pingasuniit inerteqqutit arlallit atorunnaarsinneqassapput. Taamaalilluni inerteqquterpassuit sapaatip akunnerini arlalinni atuussimasut innuttaasunullu killilersuisimasut sakkukillineqassapput.

Arfininngorpat ullaakkut arfineq-pingasunut inuinnaat suliffeqarfiillu illoqarfinnut allanut nunaqarfinnullu tikeraarsinnanngussapput. Akerlianik nunanut allanut angalasinnaanermik inertequteqarneq atuutsiinnarneqassaaq, tassungalu atatillugu malittarisassat allanngortinneqanngillat.

Nunapi iluani angalanissamut tunngatillugu aqangumiit Air Greenlandimut Disko Linemullu inniminniisoqarsinnaalissaaq. Timmisartukkut angallaffissat piareersarneqaleruttorput.

Inini ataasiakkaani katersuunniaraanni, inip inunnik qanoq amerlatigisunik isersimaffigineqarsinnaarata affai isersimasinnaanngussaput. Bussini inuit issiavinnut naammattut ksimik ilaasinnaassapput.

Tassa imaappoq, timersortarfinni timersortoqaqqissinnaanngorpoq.

Nujaleriffiit suliffeqarfiillu allat inuit qanoq amerlatigisut katersuussinnaatitaanerannik malinnikkut ammaqqissinnaanngorput.

Imatut paasillugu, neriniartarfiit, cafeet imerniartarfiillu arfininngorpat ammarsinnaapput, init inunnik aalajangersimasunik amerlassusilinnik isersimasoqarnissamut akuerisaasimasut, affaannik isersimasoqarsinnaagunik.

Oqartussat assigiinngitsut innuttaasunullu sammititamik allaffiit ataasinngorpat iserfigineqaqqissinnaanngussapput.

Amerlanerpaamik 100-t katersuussinnaasut

Katersuutissagutta amerlanerpaamik 100-juussaagut. Atuarfinnulli tunngartillugit malittarisassat allat atuupput, Karl Frederik danielsen nassuiaavoq.

Danmarkimit angalasut nunamut isernissamut qinnuteqaqqaartassapput, siusinnerusumullu tunngatillugu malittarisassat allannguuteqanngillat. Nunatsinni Nakorsaanerup nassuerutigaa, ilinniagaqartorpassuit efterkolenilu atuartorpassuit aasamut Kalaallit Nunaannut angerlarusuttut eqqarsaatigalugit unammillernartoqatoq. Akunnattoorfik nunatsinni nakorsaanermit nalilersorneqartassasoq.

Nunatsinni Nakorsaaneq Henrik L. Hansen oqarpoq:

- Kingullermik tunillatsittoqarmalli maanna sapaatip akunneri pingasut ingerlareerput. Taamaammat Kalaallit Nunaanni tuniluuttoqanngitsoq naatsorsuutigisinnaavarput. Maannalu nalinginnaasumik inuuneqaqqilernissarput isumagineqassaaq. Peqqissuunermummi aalajangiisuulluinnarpoq, nunami maani tamtta nalinginnaasumik atugaqaleqqinnissarput, Nunatsinni Nakorsaaneq oqarpoq.

Nunamut tikittut marloriarlutik misissorneqartassasut

- Nunami sunut tamanut angalasoqarnerani ulorianartoqarsinnaagaluartoq, matoqqatitsiinnarneq peqqissutsitigut illersorneqarsinnaanngilaq. Tunillatsisimasunimmi nutaanik suli nunamut isertoqarsinnaavoq. Nunamut tikinniartunut tamanut paasissutissiissutigisartakkavut annertusaleruttorpavut, tikittullu marloriarlutik misissorneqartarnissaat anguniarlutigu. Periusissiami inassuteqaativut suli atuuttut tassaapput, tuniluunnerup Kalaallit Nunaannut anngunnaveersaartinneqarnissaanut tunngassuteqartut, Henrik L. Hansen piffissaq ungasinnerusoq eqqarsaatigalugu tamatuma attaanneqarnissaannginneranik nassuertoq ilisimatitsivoq.

- Sulili piffissaqartinneqarnissarput pisariaqartipparpt. Ingerlatsinitsinnilu matumani qanoq ingerlariaqqissanerluta Naalakkersuisunut inassuteqaatinik suliaqartuarpugut. Akissutissat ataasiakkaaginnaanngillat. Nunat allat aperisinnaanngilagut, Nunatsinni Nakorsaaneq oqarpoq.

Danmariki pissutsit pitsaanerulersut

- Danmarkimi pissutsit maanna pitsaanerujussuanngorsimapput. Atorsimanngisaminnik sinneqartooruteqarput. Kalaallillu Nunaanni maani naatsorsuutiginngisamik pisoqassagaluarpat, sapaatip akunnialuinut matuma siornanut sanilliullugu angusaqareersimaqaagut. Sulili mianersornerput ingerlakkusupparput, taamaammat nunanut allanut angalanissamik mattussisimanerup attatiinnarallarneqarnissaa inassutigalugu, Nunatsinni Nakorsaaneq oqarpoq.

Nuuk taamaalilluni nunap sinneratulli atugaqalerpoq.