Nunami ikuallattumik takunnittut qamisaanermi ikiuuttut
Takunnittut Nuummilu qatserisartut qisuariapallannerat pissutaalluni, Nuup eqqaani nunami ikuallanneq piaartumik qamisarneqarsinnaasimavoq.
Nuummi qatserisartut sapaatiummat ualikkut nalunaaqutaq 16.30 missaani nalunaarfigineqarput Nuup eqqaani Sermitsiap qeqertaata kujammut sammisortaani, nuna ikuallalersimasoq.
- Nuna ikuallattoq immamut ungaserujussuanngilaq. Piffissaq sukkakannertoq atorlugu qatserisartut tikiussinnaasimapput qamisaallutillu, Kommuneqarfik Sermersuumi Upalungaarsimasut pisortaata tullia, Jakob Petersen Sermitsiaq.AG-mut oqaluttuarpoq.
Suna ikuallannermut pissutaanersoq paasineqanngilaq.
Takunnittut ikiuuttut
Upalungaarsimasut pisortaata tullia oqaluttuarpoq takunnittut ilaat nuna ikuallattoq pakkersimaarniarlugu nuna assassimagaat.
Takunnittut ilaat, Arnannguaq Thiessen, Facebookimini oqaluttuarpoq James Thiessen, Canadamiinnermini Issittumi nunap ikuallanneranik qamisaanermik misilittagaqarluartoq, nunami ikuallattumi qamisaasimasoq. Arnannguup arnaa facebookimini assinik videonillu amerlanerusunik ikkussisimavoq, taakkulu allaaserisap naqqani takusinnaavatit.
Upalungaarsimasut pisortaata tulliata, Jakob Petersenip, innuttaasut pisumi ikiuussimanerat qujamasuutigaa, ikuallattoqartilluguli innuttaasut ingalassimanissaat aamma kaammattuutigalugu.
- Siullermik qulakkeerneqartariaqarpoq peqqinnissamut ajoqusiissannginnersoq. Tassa putsumik najuussinnginnissaq, innerullu qanillivallaannginnissaa eqqumaffigineqartariaqarpoq, oqarpoq.
- Taamalu oqartuaannareeraluarluta, innuttaasut kaammattuutigeqqissavarput pujortareernermi kimmiviit ikumaartut suli nunamut iginneqartassanngitsut, igaarsimanermi igaarfiup qamilluarnissaa qulakkeerneqartassasoq aammalu eqqakkat pinngortitamut igiinnarnagit illoqarfimmut oqqunneqartassasut. Taamaasiornermi nunap ikuallannissaa pinngitsoortinniarneqarsinnaavoq. Takusareerparput sodavandip puukuisa igalaaminertaasa seqinermut kissatsitsillutik nunamik ikuallatsitsilertartut, tamannalu kissaatiginanngeqaaq, oqarpoq.
Assit videollu amerlanerit uani takusinnaavatit:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...