Nunalerinermik inuussutissarsiuteqartunut aningaasatigut tapiissuteqartoqassaaq
Aningaasaqarnermut Akileraartarnermullu Ataatsimiititaliaq Naalakkersuisut inassuteqarnerat tunngavigalugu aalajangerpoq, nunalerinermik inuussutissarsiuteqartunut aningaasalersuinermut immikkut ittumik tapiissutit 5 millioner koruuninik amerliniarlugit. - Tapiissutit qaffanneqarnerat pitsaasuuvoq, Kalistat Lund isumaqarpoq.
Nunalerinermik inuussutissarsiuteqartunut aningaasatigut tapiissutit 2022-mi 3,5 millioner koruuninit 5 millioner koruuninut amerlineqarput.
Aningaasaqarnermut Akileraartarnermullu Ataatsimiititaliaq Naalakkersuisut inassuteqarnerat tunngavigalugu taama aalajangertoqartoq, Nunalerinermut Naalakkersuisoqarfik allappoq.
- Piffissaq artorsarfiugaluartoq nunalerisunut aningaasalersuinermut tapiissutit qaffanneqarnerat pitsaasuuvoq. Qaffaanikkut nunalerisut ajornartoornermi pitsaanerpaamik aniguinissaat qulakkiissavarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
COVID-19-ip ajornartoortitsinera, tamatumalu kingorna Ukrainemi sorsunnerup aallartinnera peqqutaallutik nunalerisunut nerukkaatissat naggorissaatissallu akii qaffariarujussuarnikuupput.
37 procentimik qaffappoq
Siunissami assingusumik pisoqarnissaa pinngitsoorniarlugu, Naalakkersuisut nunalerinermik inuussutissarsiuteqartut qanittumik suleqatigalugit suliassaqarfinnut taakkununnga aningaasartuutit appartinneqarnissaat sulissutigineqassasoq Kalistat Lund oqarpoq.
Tamanna narsaatini naatsitsisarnerup pitsaanerulersinneqarneratigut alliliinikkullu ukiuunerani nerukkaatissanik najukkami naatitsisarnerit annertusinerisigut pissaaq.
- Tamatuma saniatigut arlallit innaallagissiorfimminnik dieselitortunik erngup nukinganik innaallagissiorfeeqqanik seqernullu qinngornera atorlugu innaallagissiorfinnik taarsiinissaat qulakkiissavarput, dieselimut aningaasartuutit nunalerisut aningaasartuuteqarfiginerpaasaasa pingajuattut inissisimammata, Kalistat Lund oqarpoq.
Coronap sorsunnerullu pissutigisaanik nunalerisut nerukkaatissanut naggorissaatissanullu aningaasartuutaat 2021-mut sanilliullutik 4,8 millioner koruuninik qaffapput, tassalu qaffaat 37 procentiulluni, Naalakkersuisoqarfik ilisimatitsivoq.
Qinnuteqarneq
Aningaasartuutinit tamarmiusunit nerukkaatissanut naggorissaatissanullu aningaasartuutit 50 procentiusarmata, aningaasartuutit qaffaataat nunalerisut aningaasaqarnerannut tamarmiusumut sunniuteqangaatsiarput.
Nunalerinermut Naalakkersuisoqarfiup Savaatillit Peqatigiit Suleqatigiissut aamma Nunalerinermut Siunnersorteqarfik suleqatigalugit qinnuteqaammik suliaqarluni aallartinniarpoq. Qinnuteqaateqarluni suliaq taanna inissippat nunalerisut ilisimatinneqassapput.
Nunalerisunut ataasiakkaanut tapiissutit aningaasaliissutinut qinnuteqartoqareerneratigut, aammalu nersutinik toqoraaffimmiit savat nersussuillu tunisat kisitsisitaat pisortatigoortut tunngavigalugit akilerneqassapput.