Hans Ulrik Skifte NunaGreenimi pisortaaninngussaaq, ingerlatseqatigiiffik decembarimi 2022-mi pilersinneqartoq, tusagassiuutitigut nalunaarummi paasissutissiivoq. 

Kommuneqarfik Sermersuumi Sanarfinermut Avatangiisinullu pisortatut atorfimminngaanneerpoq, maannalu ingerlatseqatigiiffimmi pilersinneqaqqammersumi, Inatsisartut inatsimmik uuliasioqatigiiffiusimasup NunaOilip mingutsitsinngitsunik nukissiuutinik ingerlatseqatigiiffinngorsinnaalerneranik aqqutissiuussisumik atorunnaarsitsinerisigut aqqutissiuunneqarsimasumi, siuttunngussalluni.

- Hans Ulrik CEO-nngortussatut atorfimmut kajungilersissinnaasimagatsigu nuannaarutigisorujussuuarput tulluusimaarutigalugulu.

Taama NunaGreenip siulersuisuini siulittaasoq, Stine Bosse, oqarpoq. 

Taanna naapertorlugu Hans Ulrik sulianut pikkoriffeqarnermik ilisarnaateqarpoq, patajaatsunik aqutsinermik misilittagaqarluni, ingerlatsivimmi qanoq ingerlatsisoqartarnera paasisimasaqarfigalugu aammalu politikkimut tunngasut ilisimasaqarfigalugit.

Mingutsitsinngitsunik atuileriartuaarnermut qulakkeereqataassasoq

Hans Ulrik Skifte kommunimi avatangiisinut teknikkinullu suliassanik aqutsinermi ukiorpassuarni misilittagaqarnermi saniatigut, nukissiornermut ingerlatseqatigiiffinniit, Polaroilimit aamma ESANI-mit, paasisimasaqarpoq. Hans Ulrik Skifte ingeniøriuvoq issittumi teknologii immikkut ilisimasaqarfigalugu aammalu aqutsinermut tunngasuni qullersatut mini-MBA ilinniarsimallugu. 

- Atorfimmi tassanerpiaq sulilernissara qilanaarisorujussuuara. Kalaallit Nunaanni mingutsitsinngitsumut allanngoriartortitsinermut pingaaruteqartumuinnaanngitsoq, kisianni aamma ilisimasanik inerisaanermut peqataasinnaanissaq aammalu Kalaallit Nunaata pisuussutaanni aningaasaqarnikkut soqutigisatta qulakkeereqataaffiginissaat, qilanaarisorujussuuara, Hans-Ulrik Skifte oqarpoq.

NunaGreen nutaaq aningaasaqarnikkut soqutigisanik isumaginnissaaq Kalaallit Nunaannilu ataavartumik nukissiornerup assigiinngitsunik iluseqartup iluani misilittakkanik annertusaassalluni. Tamatuma peqatigisaanik NunaGreen suliniutinik mingutsitsinngitsunik atuileriartuaarnermik siuarsaaqataasussanik ineriartortitseqataassasoq aammalu inuiaqatigiinnut isertitassanik qulakkeerinneqataassasoq pilersaarutaavoq.