Nuummi Uumasut
Nunafondi uummasut passunneqarnissaannut isumannaarivoq
Nunafond 100.000 koruuninik tapiissuteqarneratigut Nuummi uummasut inuttaqanngitsut ajoqusersimasullu uumasut nakorsaannik passunneqarsinnaanissaat isumannaarneqarpoq
Nunafondimiit Nuummi Uumasut sulineranut tapiissutit marluupput, tassaallutik 8.354 koruunit aamma 100.000 koruunit.
Tunniussalli uumasut napparsimasut misissorneranni atortussamut, mikroskoppisinissamut uummasunut inuttaqanngitsunut ajoqusersimasunut nakorsaanernut atorneqartussatut piumasaqaateqarfigineqarput..
- Aallartinniarneq aammalu aallartisarneq akisusimavoq, uagut assut nuannaarutigaarput Nunafond tapersermatigut, tamanna uagutsinnut ima periarfissanik ammaassivoq, tassa uummasut inunnik pigineqanngitsut ajornartoorsimasut ajoqusersimasullu aamma nakorsartinneqarsinnaalernerannik. ”Tamatuma saniatigut sulinermi atortussamik mikroskoppimik pisisinnaalerpugut, taamaasillunilu uummasut nakorsaat pitsaanerusumik sullissisinnaalerluni misissuinermini aammalu nalilersuinermini uummasunik napparsimasunik passussitilluni naamikkut anniartunik aammalu aammut atatillugu nappaatinut tunngasunut, Nuummi Uumasut siulersuisuni siulittaasoq Tom Amtoft taama oqarpoq.
Nuummi Uumasut peqatigiiffiuvoq, Nuummi uummasut nakorsaqarsinnaanissaannik isumannaarinnikkusuttoq. Uummasunut nakorsiartarfik, Donnap Uummasunut Nakorsiartarfia, toqqaannartumik peqatigiiffimmit pinngortuuvoq, maaji 2014-imi ammarluni.