Skip to main content

Nuna tamakkerlugu timersornermi suli unammiuaartoqartassanngilaq

Namminersorlutik Oqartussat katersuunnissamut killilersuutaagallartut atuuffiat aamma Kalaallit Nunaannut Kalaallillu Nunaanniit angalanissamut piumasaqaatit januaarip sisamaani sivitsorpaat. Tamatuma malitsigisaanik kommunit akimorlugit katersuunnissamut inerteqqutaasoq minnerpaamik apriilip 30-ata tungaanut atuuttussanngortinneqarpoq.

Katersuunnissamut killilersuutit apriilip 30-ata tungaanut sivitsorneqarnerat timersornikkut sammisassaqartitsinermut eqquingaatsiarput.

Killilersuutit naapertorlugit ilaatigut illup iluani inuit amerlanerpaamik 100-t silamilu amerlanerpaamik 250-it katersuuteqqusaapput. Tamatumalu saniatigut aamma kommunit killeqarfii akimorlugit aaqqissuussanut peqataasoqaqqusaanngilaq.

Inerteqquteqarnikkut assersuutigalugu Assammik arsarnermi futsalimilu Kalaallit Nunaanni pissartanngorniutsitsisinnaaneq ajornakusoortinneqarpoq, timersuutit taaneqartut nunamit tamarmik timersortartunit ornigarluarneqartaraluarput.  

Killilersuutit politikkikkut katersuunnissamut atuutsinneqanngillat, tamannalumi Siumup novembarip qaammataani nunamit tamarmit 60-ingajannik peqataatitaqarluni nuna tamakkerlugu Nuummi ataatsimeersuarnissaanut tunngavilersuutigineqarsimavoq.

Killersuutit tamaasa takukkit UANI

Angalanissamut killilersuutit

Katersuunnissamut inerteqquteqarnerup saniatigut Namminersorlutik Oqartussat Kalaallit Nunaannut Kalaallillu Nunaanni angalanissamut malittarisassanik aamma sivitsuisimapput.

Malittarisassat ilaatigut naapertorlugit, timmisartumut Kalaallit Nunaannukarniartumut ikitinnani coronamik tunillatsissimannginnermut uppersaammik takutitsisoqarnissaa piumasaqaataavoq.

Maannakkorpiaq misissortissimanermut uppernarsaat ullut tallimat sinnerlugit pisoqaassuseqartussaanngilaq (nal.ak. 120-t), nunattali nakorsaanerata ilisimatitsissutiginikuuaa, nalunaarut nutaaq malittarisassanik sukateriffiusimasoq takkutingajalersoq, tassa taanna malillugu misissortissimanermut uppernarsaat aallarnerup nalaani annerpaamik ullunik pingasunik pisoqaassuseqartussaavoq.

Kalaallit Nunaannukarlutik ilaasut immersugassaq Sumut immersorsimasussaavaat, tassani sumiissimaneq aamma sumunngarneq allassimassaaq, tamatumalu saniatigut inuit aqqaneq-marluk sinnerlugit ukiullit timmisartumi qanermut assiaquteqarnissaat suli piumasaqaataavoq.

Killersuutit tamaasa takukkit UANI

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER