KL

DK

Nuna tamakkerlugu killilersuisoqalerpoq

Nuna tamakkerlugu kikkulluunniit isersimaffigisinnaasaanni unnuap qeqqaniit killilersuisoqalissaaq. Nunaqarfiit misissuisoqarfiusinnaanngitsut tunillatsittoqarsimanngikkunik killilersuisoqarneranut ilaatinneqassanngillat. Tuniluuffiusuni tamani qanermut assiaqutit atuutsinneqalerput angallannermilu killilersuutit nunamut tamarmut atuutsinneqalerlutik.

Merete Lindstrøm

Nunap ilaani killilersuutit arlallit atuutereersut nunamut tamarmut atuuttussanngorput. Soorlu tamanit isersimaffigineqarsinnaasuni akiuussusersimanissamut coronamilluunniit tunillatsissimannginnermut uppernarsaateqarnissamut piumasaqaatit.

Naalakkersuisut tusagassiorfinnut nalunaarutaat naapertorlugu malittarisassat atuutsilerneqarput nunap iluani tuniluunnerup siaruatsaalineqarniarnerani.

Illoqarfinni nunaqarfinnilu ulluni 14-ini kingullerni Covid-19-imik, aallaavii ilisimaneqanngitsumik tuniluuttoqarneranik paasisaqarfiusuni qanermut kiinnamulluunniit assiaqutinik atuisoqartussanngorpoq.

Meeqqat 12-ileereersimasuniit inersimasut ilanngullugit kikkulluunnit isersimaffigisinnaasaanni qanermut assiaquteqartassapput. Tamanna assartuutinut tamanit atorneqarsinnaasunut aamma atuuppoq.

Killilersuutit taakku Nuummi, Upernavimmi Qasigiannguanilu maanna atorneqareerput.

Nunap iluani angallannerit

Nunap iluani angallannernut killilersuinerit aamma sukaterneqarput. Sumiilluunniit angalassatilluni akiuussusersimanissaq coronamillu tunillatsissimannginnermut uppernarsaateqarnissaq piumasaqaataalerput.

Malittarisassaq taanna Nuummi, Upernavimmi Qasigiannguanilu sapaatip akunnerata siulianili atuutsinneqalerpoq.

Akiuussusersimanngitsut marlunniik qummut ukiullit angalanermit tikinnerminni ulluni 14-ini angerlarsimaannaqqusaalerput, tunillatsissimasinnaanermullu misissorteqqaartalissallutik. Tikiffigisami misissortissinnaanngikkaanni ulluni 14-ini angerlarsimaannarnissamik piumasaqaat malinneqassaaq.

Angerlarsimaannaqqusaasut aaqqissuussanut katersuunnernullu peqataassanngillat. Pisariaqavitsilluguli pisiniarsinnaassapput, qanermut kiinnamulluunniit assiaqutinik atugaqarlutik.

Ilisimasat

Inuk akiuussusersuinermi naammassinninnermini, aammalu tamatuminnga uppernarsaammik takutitsisinnaalernermini Covid-19-imut akiuussusersuinermi naammassinnissimasutut isigineqalertarmat.

Inunnut siornatigut Covid-19-imik tunillatsissimasunut, aamma uppernarsaammik, PCR-imik misissuineq atorlugu Covid-19-imik tunillatsissimanermik takutitsiviusumik takutitsisinnaasunut, piffissarlu atuiffiusoq sivikinnerpaamik ullunik 14-iniit sapaatit akunnerinik 12-inik ungasissuseqarpat, tamakkiisumik akiuussutissinneqarsimasunut maleruagassat atuupput.

Covid-19-imut misissortissimanermut uppernarsaat atuuttoq tassaassaaq PCR-imik misissortinnermi tunillatsissimannginnermut uppernarsaat imaluunniit timip akiuussutissaqarneranut uppernarsaat, peqqinnissaqarfik sinnerlugu misissugassatut tiguneqarsimasoq, aammalu sivisunerpaamik nal. ak. 48-nik pisoqaassusilik.

Ilaatigut politiinut, peqqinnissaqarfimmut aamma Issittumi Sakkutooqarfimmut atuutsitsinngitsoqarpoq.

Paasisat: Naalakkersuisut

Kikkulluunniit isersimaffigisinnaasaanni killilersuutit isumaqarput iserniaraanni akiuussusersimanermut uppernarsaateqarnissaq, imaluunniit coronamut tunillatsissimannginnermut uppernarsaammik, akunnernik 48-nik pisoqaassuseqalereersimanngitsumik, takutitsisinnaanissaq.

Init, inuit tamat iserfigisinnaasaat, aammalu inuit nalinginnaasumik sivikitsumik isersimaffigisinnaanngisaat piumasaqaammut ilaatinneqarput, soorlu:

  • Neriniartarfiit, kaffisorniartarfiit, imerniartarfiit, diskotekit assigisaallu.
  • Kulturikkut sullissiviit, taakkununngalu ilaatigut kulturip illorsui, filmertarfiit, katersugaasiviit saqqummersitsisarfiillu ilaatinneqarput.
  • Innuttaasut illui assigisaallu.
  • Atuakkanik atorniartarfiit.
  • Illup iluani timersortarfiit – ilaatigut init inersuillu timersortarfiit, naluttarfiit, timigissartarfiit ilaatinneqarput.
  • Nujalerisarfiit, tagiartuisarfiit, pinnersaasarfiit assigisaallu.

Ukunani pineqartuni tamakkiissumik akiuussusersimanissamut imaluunniit misissortissimanermut piumasaqaammut piumasaqaatitaqanngillat:

  • Init taakkulu silataanni nunaminertat, ulluinnarni atugassanik niuertarfittut atorneqartut.
  • Allakkeriviit.
  • Mittarfiit.
  • Pisortani oqartussaasut suliffeqarfiillu pilersuisut iniutaat saaffiginnittunik sullissivigineqartut, saaffiginnittarfiit il.il.

Inuit uku ilaatinneqanngillat:

  • Meeqqat 12-it inorlugit ukiullit.
  • Inuit illoqarfinni nunaqarfinniluunniit ulluni kingullerni 14-ini Covid-19-imik, aallaavii ilisimaneqanngitsumik tuniluuttoqarneranik paasisaqarfiusimanngitsuniittut, aammalu Covid-19-imut misissortinnissamut periarfissaqarfiunngitsuniittut.

Corona.nun.gl iserfigalugu “Sumiiffinnut killilersuinerit” ataanni illoqarfiit nunaqarfiillu suut ulluni 14-ini kingullerni aallaaviinik ilisimaneqanngitsunik tunillatsiffiusimanersut allattorneri nutartikkat takusinnaavatit.

Piumasaqaat 6. december 2021-mi Nuummut, Upernavimmut (nunaqarfiinullu) aamma Qasigiannguanut atuutilissaaq. Sumiiffiit taakku ulluni 14-ini kingullerni tuniluuffiusimammata.

Malittarisassat 6. december 2021-mi atuutilissapput 6. marts 2022-mullu killilerallarneqarlutik.

Sumiiffinnut tamanut isersinnaanermut nalunaarut UANI atuarsinnaavat.

Angallanneq pillugu nalunaarut UANI atuarsinnaavat.

nunatsinnit inuiagatigiit peqqinnissaq
Powered by Labrador CMS