Katersuiniarneq
Nuna tamakkerlugu katersuiniarneq aallartiaarit - maanna tapersiigit
Nuna tamakkerlugu katersuiniarnermut maanna SMS-ikkut peqataasinnaavutit, taanna meeqqat atornerlunneqarnermut illersorneqarnissaannik siunertaqarpoq.
Nakuusap nuna tamakkerlugu katersuiniarnera marsip pingajuanni pisussaq maanna aallartereerpoq. Angallattakkamik oqarasuaateqaruit SMS-erlutit siunertamut pitsaasumut massakkut taperseeqataasinnaanngorputit, suleqatigiiffik ilisimatitsivoq.
2017-ip ingerlanerani Nakuusap nunatsinni ajornartorsiutaaqisoq aserortereqisorlu samminiarpaa, tassaasoq meeqqanut kinguaassiutitigut atornerluisarneq. Ukiunili kingullerni suliniutit ilinniarsimallutik sulisunut meeqqat kinguaassiutitigut innarlerneqarsimaneranut ilisimasassanik pasitsaassaqarnermilu sakkussanik sanaartuinernut samminikuupput, suleqatigiiffik tusagassiuutinut nalunaarummi ilisimatitsivoq.
- Nakuusap nutaamik suliniuteqarnermini angajoqqaanut meeqqamullu inersimasut qanigisaasunut meeqqamik kinguaassiutitigut atornerlunneqarsimaneranik pasitsaassaqarnermi paasisaqarnermiluunniit sakkussanik suliniuteqarniarpoq. Tapersiinerit tamannguisa pisariaqartippagut. Tapersiinerit tamarmik naleqarput, Najaaraq Møller oqarpoq.
Ima iliussaatit:
- 150 koruuninik tapiigit: SMS ''NAKUUSA C'' allariarlugu 1880-mut nassiuguk. 150 koruuninik tapiissuteqarputit, umiatsiaararlu Poca 500 GR 70Hk Suzukimik motooritalik atortussaleriigarlu katillugit 147.000 koruuninik nalilik.
- 100 koruuninik tapiigit: SMS ''NAKUUSA B'' allariarlugu 1880-mut nassiuguk. 100 koruuninik tapiivutit, angalanissamullu gavekortimik 10.000 koruuninik nalilimmik eqquinissamut peqataavutit.
- 50 koruuninik tapiigit: SMS ''NAKUUSA A'' allariarlugu 1880-mut nassiuguk. 50 koruuninik tapiivutit, iPadimillu 4.295 koruuninik nalilimmik eqquiniaanermut peqataassaatit.
Ullormut SMS ataasiinnaq nassiunneqarsinnaasoq aamma peqataasut 18-ileereersimassasut, Nakuusap ilisimatitsissutigaa.
Toqqaannartumik tv-ikkut aallakaatitsineq
Katersuiniarneq KNR-TV-ikkut toqqaannartumik nal. 20.00-miik akunnerni pingasuni aallakaatinneqassaaq.
Najaaraq Møllerip suliffeqarfiit annertunerusumik tapiissuteqaqqullugit aamma kajumissaarivoq. Tamanna konto normumut aningaasanik nuussilluni pisinnaavoq: 6471 1493911, suliffeqarfiullu ateq/imaluunniit suliffeqarfiup aqqa ilisimatitsissutiginissaa eqqaamassavaa.