Nuna tamakkerlugu inuusuttut aanngajaarniutinik ajornartorsiuteqartut

Ikiaroornartumik pisiffissaarutsillugu illoqarfimmi 'inuusuttut akornanni malunnartumik toqqissisimajunnaarneq takkuttartoq' oqaatigineqarpoq.

Nuna tamakkerlugu inuit inuusuttunik attaveqartut, hashimik aamma imigassamik atornerluineq ernumanartoqartippaat. Meeqqat inuusuttullu aanngajaarniutinik pinnguaatinillu ajornartorsiuteqartut pillugit suliniutissatut siunnersuummi, maanna tusarniaassutigineqartumi tamanna atuarneqarsinnaavoq.

Siunnersuutip suliarineqarneranut atatillugu kommunini tamani illoqarfinni annerni atuarfinnit, ilinniarfinnit, ilaqutariinnut sullissivinnit, Majoriamit, peqqinnissaqarfinnit aamma kommunini oqartussaneersut 35-it apersorneqarsimapput.

- Kommuninit tamaniit paasissutissiisut naliliipput aanngajaarniutinik ajornartorsiut sullinniakkani sumiiffinni ajornartorsiutini annersaasoq amerlanersaasalu sumiiffinni katsorsaanissamik pisariaqartitsineq annertuujusoq oqaatigalugu, pilersaarummi tamanna allaqqavoq.

Inuusuttut 15-it aamma 24-t akornanni ukiulinni haship atugaanera ernumanartoqartinneqarpoq.

- Nalinginnaasumik ikiaroornartoq immikkut ajornartorsiutaasutut isigaat. Paasissutissiisup ataatsip assersuutigalugu oqaluttuaraa ikiaroornartumik pisiffissaarutsillugu illoqarfimmi inuusuttut akornanni malunnartumik toqqissisimajunnaarneq takkuttartoq. Kommuninit amerlanernit nalunaarutigineqarpoq isertuanngitsumik ikiaroornartumik niuertoqartartoq apersuinermilu peqataasut arlalissuit aanngajaarniutinik isertuanngitsumik tuniniaaffiit atuiffiusullu tikkuarneqarsinnaallutik.

- Ikiaroornartoq ukioqatigiiaani tamani innuttaasunilu assigiinngitsuni tamani ajornartorsiutaasutut isigineqarpoq, paasissutissiisulli ilaasa 8 nalunaarutigalugu ikiaroornartumik ajornartorsiuteqarneq angutit inuusunnerusut aningaasakilliortut aamma peqatigisaanik allanik ajornartorsiuteqartut akornanni annertunersaasoq.

Inuunianikkut kingornuttakkat

Amerlanertigut inuusuttut atornerluineq kisiat ajornartorsiutigineq ajorpaat. Ajornartorsiutit itinerusut takussutissartarigunarpaat, kommunit taama misilittagaqarput.

- Tassunga atatillugu pingaartumik eqqaaneqarput sumiginnaaneq, angajoqqaat najuutinnginneri angerlarsimaffimmilu aanngajaarniutinik allanik atuisut pissutaasut pingaarnerit ilagigaat inuusuttuni aanngajaarniutinik atuisuusut akornanni ingerlateqqinneqartartut.

Inuuneq artorsarfiuleraangat, inuusuttut ilaat aanngajaarniartarput.

- Paasissutissiisut akuttunngitsumik takusarpaat inuunermi ajornartorsiummik iluarusuuteqannginnerup annikillisinneqarnissaanut imminut nakorsaasersuutitut aanngajaarniutit atortaraat, pilersaarummi tamanna aamma oqaatigineqarpoq.

Pilersaarut meeqqanut inuusuttunut pitsaaliuinermut aamma atornerluinermut katsorsaanermik kinguneqassaaq.

Powered by Labrador CMS