Nuna tamakkerlugu assigiimmik nalunaaqutaqarnissaa Justus Hansenip kissaatigaa

Demokraatip Ittoqqortoormiini nalunaaquttat nikisinneqarnissaat kissaatigaa.

Ittoqortoormiit nunap sinnerata nalunaaqutaa malissavaa. Justus Hansen (D), suliamut tunngatillugu §37 atorlugu apeqquteqartoq, isumaqarpoq.

- Nunarput inukitsunnguuvoq aamma taamaattumik nunap innuttaasa ilamininngui (Ittoqqortoormiit) nunap sinneranut naleqqiullutik akunnernik marlunnik siulliunerat. Tamanna arlalitsigut pisarissersuutaavoq pinngitsoortissinnaasaralutsinnik aalajangerneqartuuppat nuna tamarmik assigiimmik nalunaaqutaqartinneqassasoq, Justus Hansen (D) tunngavilersuilluni allappoq.

Nunarsuaq tamakkerlugu 24-nik nalunaaqutaqatigiissaakkanik aggulussimavoq, Englandimi Greenwich aallartiffiulluni 0-iutinneqarluni. Nuuk Greenwichimiit akunnernik pingasunik siulliuvoq (UTC -3), Ittoqqortoormiillu UTC -1-imiilluni, UTC-2-mulli qaninnerungajalluni. Taamaammat Ittoqqortoormiit allatut nalunaaqutaqarput.

Nalunaaqutalersuulli nunatsinni malinneqaqqissaanngilaq, taamaassappat Tasiilaq Nuummiit akunnermik ataatsimik siulliussagaluarpoq, Qaanaarlu UTC-4-miilluni, tassa Nuummiit akunnermik ataatsimik kingulliulluni.

Nunap iluani nunami allanngutsaaliukkamiittoq Issittumi Sakkutooqarfik nalunaaquttamik aamma malinninngilaq, tassanimi Greenwichip nalunaaqutaa malinneqarpoq, UTC 0-imiilluni.

Powered by Labrador CMS