Nuna ikuallattoq: Illuaqqat isumannaarnissaa ukkatarineqartoq
Danmarkimit ikiuuttussat aggernneranni qatserisartut aamma kajumissutsimik suleqataasut Kangerluarsuk Tullermi nunap ikuallanneranik suli qamisaapput.
Kangerluarsuk Tullermi nunap ikuallannera Avannaata Kommuniani, Qeqertalik Kommuneani, Qeqqata Kommuniani kiisalu Sisimiuni innuttaasunit namminneq kajumissutsiminnik ikiuuttunit suli qamisarneqarpoq.
- Ikuallattoq illuaqqanut angutsaaliortillugu maannakkut qamisaanermik ukkatarinnipput. Uutap Kuuata kangiani ikuallattumut qaninnerpaasumi illuaqqanik piginnittut atortunik ikuallajasunik, soorlu gassinik, benzinanik dieselinillu piiaanissaannik piumaffigineqarnikuupput. Kuullu kitaatungaani, aappaluttumik ammalortumik nalunaarsoqqasumi, illuaqqanik piginnittut aammattaaq sillimaniarneq eqqarsaatigalugu atortunik ikuallajasunik piiaaqquneqarnikuupput, Qeqqata Kommunia tusagassiuutinut taama nalunaaruteqarpoq.
- Qeqqata Kommunianut upalungaarsimasunullu nuannaarutigineqaqisumik, upalungaarsimanermut ataatsimiititaliarsuup Danmarkimut ikiortissarsiornissamik innersuussutaanik Naalakkersuisut akuersissuteqarput, tamatumunngalu atatillugu Danmarkimi Upalungaarsimanermut Aqutsisoqarfimmit ullumi 2019-imi aggustip 13-iani nal. 17-18 akornanni qatserisartut 38-t tikissapput. Kangerluarsuk Tullermi nunap ikuallanneranik qamisaajartussapput, Uutap Kuuata tungaanut ikuallattup siaruannginnissaa anguniarlugu naanernik piiaassapput
- Ilutigitillugu borgmesteri Malik Berthelsen aamma upalungaarsimanermut pisortaq Ole Kreutzmann Sisimiuni suliffeqarfiit innuttaasullu nunap ikuallanneranik qamisaanermut atatillugu annertuumik ikiuussimanerinik qujassuteqarput.
- Suliffeqarfiit nerisassanik/imeruersaatinik tunissuteqarput kiisalu angallatinik, maqitsissutinik atortunillu allanik atugassaqartitsillutik - Sisimiuni innuttaasuttaaq imeruersaatinik/kaaginik il.il. pajuttuipput kiisalu qatserisunut nerisassiornermik isumaginnittussamik pilersitsillutik.
- Upalungaarsimanermi Aqutsisoqarfimmit qatserisartut 38-t maanga tikippata, nerisaqartitsinissamut aaqqissuussaq suli pisariaqartinneqassaaq, taamaattumillu nerisaqartitsinermut aaqqissuussap ingerlatiinnarneqarnissaa kiisalu suliffeqarfiit Kangerluaarsuk Tullermut assartuinissamut periarfissaqqartitsiinnarnissaat neriuutigaarput.