Nukissiorfiit: Sisamanngornermi kabeli timmisartumik takusassavarput
Nukissiorfiit Issittumilu Sakkutooqariup innaallagissamik pilersuinermut ajornartorsiutaasut sisamanngornermi paasiniarniarpaat, ataavartumik aaqqiissutissarsiniarlutik. Ajoqutaasunik iluarsaassineq ullup affaanik sapaatilluunniit akunnerinik arlalinnik sivisussuseqarsinnaavoq, Nukissiorfiit pisortaat ilisimatitsivoq.
Ulluni arlalialunni sarfaaruttoortarnerit, telefonit internetsillu attaveeruttarneri illoqarfiit pingaarnersaanni atuussimapput. Sisamanngorninngorluni unnuakkut ullaakkullu Nuummi innaallagissamik pilersuiniarneq suli pitsaavallaanngilaq.
Silalu suli ajornartorsiortitsisinnaavoq, Nukissiorfinni nukissiuuteqarnermut pisortaq Kaspar Mondtrup erseqqissaavoq.
-Piffissami kingullermi attaveeruttoqartarneranut suna pissutaanersoq paasinissaata tungaanut attaveeruttoqartarnissaa naatsorsuutigisariaqarparput.
Utoqqarmiut Kangerluarsunnguanni erngup nukinganik nukissiorfiik ajutooqqavoq, taamalu arlaleriarluni aallarteqqinneqartariaqarsimalluni aamma illoqarfik tamarmiusoq innaallagissamik pilersorniarlugu sillimmatigineqartup aallartinniarnera unammillernarsimavoq.
-Erngup nukinganik nukissiorfimmut attaveqaat 56 kilometerisut takissuseqarpoq, taamaamma anorersuartillugu taamatut ajoquteqaqqilertarnissaa ilimanarpoq, tamatumalu saniatigut kabelit sermersimallutik, pisortaq oqarpoq.
Issittumi Sakkutooqarfik timmisartumik nukissiorfimmukassasoq
Ulluni kingullerni illoqarfimmi innaallagiamut atassuteqaqqittoqalernissaa aamma inuiaqatigiinnut pingaaruteqarluinnartut, soorlu politiit, Tusassa, nerisassanik pilersuisut peqqinnissaqarfillu innaallagiaqarnissaat pingaarnerutillugit isumagineqarsimapput. Aamma sumiiffiit qaminngasut anguniarlugit Nukissiorfiit anorersuartoqarneranit unammillernartitsisimapput.
- Kangerluarsunnguit ilorpiaanit 30 km-isut ungasitsigisumiittumi kortsluttertoqarsimarpasippoq. Kortsluttertoqarneratigut kabelit ajoqusersimassasut isumaqarpugut. Kaspar Mondrup oqarpoq.
Pilersaarutaavorli Nukissiorfinni Issittumilu Sakkutooqarfimmi sulisut sisamanngornerup ullaavani qulimiguulimmik sumiiffimmukarlutik misissuiartornissaat.
- Kabeli ajoqusersimasoq nassaaringutsigu, sulisut ingerlaannartumik iluarsaassillutik aallartissapput.
Innaallagiaq sipaarlugu
Iluarsaassineq ingerlaannartumik aallartinneqarsinnaanngippat, Nukissiorfiit dieselitortumik pilersuineq qulakkiissavaat innaallagissiorfimmilu motoortit tallimaasut aallartinneqassallutik, taamaalilluni illoqarfik tamaat pataajaannerusumik pilersorneqarsinnaanngorlugu.
- Motoorit tamarmik aallartinneqarpata illoqarfik tamakkerlugu innaallagissamik pilersorsinnaanngussavarput. Ukiorpassuarnili taamatut inissisimasimannginnata, motoorit aallartinniarlugit sulisoqartariaqarpoq.
Kaspar Mondrupip nassuiaatigaa, illoqarfimmi sumiiffiit tulleriiaallugit sarfalersorneqartariaqartut, taamaammallu innaallagissamik pilersuineq ajoqattaartillugu pisariaqanngitsumik ikumatitsisarnissap pinaveersaarneqarnissaa kaammattuutigineqarpoq.
- Allartitseqqinniarnitsinni tamanna iluaqutaassaqaaq, Kaspar Mondrup oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...