Nukissiorfiit: Innaallagissap aqqutaani attuuttoorneq qamittoortitsisimavoq

Nuummi innuttaasorpassuit pingasunngornerup unnuaani angerlarsimaffimminni sarfaaruteriasaarput.

Nukissiorfinnit Sermitsiaq.AG-mut ilisimatitsissutigineqarpoq, nalunaaquttap 01-ip missaani Nukissiorfiit koblingsstationiisa ilaanni innaallagissap aqqutaani attuuttoortoqarmat innaallagissamik, imermik kissarnermillu pilersuinerit ajutoorsimasut.

- Innaallagissap aqqutaani attuuttoortoqarneratigut pujuliortoqalersimavoq, taamalillunilu qatserisartut ikuallattoqalinnginnissaanik qulakkeerinninniarlutik suliaqarneranni pilersuinerup aallarteqqinneqarniarnera kinguaattoorfiusimalluni, Nukissiorfinnit nalunaaruteqarlutik allapput.

Nukissiorfiit Nuummi immikkoortortaqarfiani pisortap Filip Sivertsenip itisiliilluni oqaatigaa, koblingsstationi sarfalersuinermi atortuusoq, taamaammallu innaallagissap aqqutaani attuuttoortoqarmat illoqarfiup 80 procentia sarfaarussimasoq.

Ajoquteqalersimannguatsiartoq

Innaallagissap aqqutaani qanoq attuuttoortoqarsinnaanersoq pillugu Filip Sivertsen imatut oqarpoq:

- Qanoq pisoqarsimanersoq erseqqissumik oqaatigisinnaanngilarput, ilimagaarpulli ajoquteqalersimassasoq, ajoqutaalersimasorlu arriitsumik annertusiartorsimassasoq tassanngaannarlu qamitsitsimassasoq.

- Aalajangersimasumik suleriuseqarpugut, koblingsstationit tassani misissortarpavut, ajoquteqarsimasinnaavorli takusinnaasimanngisatsinnik, immikkoortortaqarfimmi pisortaq oqarpoq.

Nukissiorfinni ingerlatsinermi sulisut unnuaq naallugu sulisimapput, nalunaaquttallu arfineq-marlup eqqaani illoqarfiup annersaa sarfaqaqqilerluni. Summiiffiilli ataatsiakkaat suli qamittoorsinnaapput.

Sumiiffiit ilaanni qamittoortoqarsinnaasoq

Tamatumunnga isumannaallisaanermi atortut pissutaannguatsiarput, Filip Sivertsen nassuiaavoq:

- Atortut annikitsut ataasiakkaat pissutaasimasinnaapput, tassa sarfaq atassuserneqaqqikkaagat naqitsineq ima annertugisinnaasarpoq allaat sarfaarutsitseqqilluni.

- Imaassinnaavoq illuni kiassaatit innaallagiatortut atassuseqqinneqaraangamik sarfamik annertunerusumik suli pisariaqartitsisut, Filip Sivertsen nassuiaavoq, erseqqissaassutigaalu Nukissiorfinni sulisut sumiiffinnut assigiinngitsunut orniguttarlutik sarfalersuiartortariaqartarnerat ajuusaarnartoq.

Nukissiorfinnit unnuaq qamittoorneq Facebookikkut saqqummiunneqanngilaq. Filip Sivertsenip oqaluttuaraa, sarfaqalersitseqqinniarluni nukiit tamarmik atorneqarsimasut, taamaammallu Nukissiorfiit avammut nalunaaruteqarnissaq politiinut upalungaarsimasunullu isumagitissimagaat.

Politiit suleqatigilluarneqartut

- Politiit upalungaarsimasullu suleqatigilluarsimavagut. Pilersaaruteqarpugulli Nukissiorfinni sulisoqalissalluta ulloq unnuarlu Facebookikkut saqqummiussisinnaasunik, Filip Sivertsen oqarpoq.

Nukissiorfinnit erseqqissaassutigineqarpoq, innaallagissap aqqutaani attuuttoorneq septembarip 19-iani annikitsumik ikuallattoqarneranut atuumassuteqanngitsoq.