Nukissiorfiit: Illoqarfinni 17-ini atuisut ornigullutik saaffiginnittariaarutissapput
Nukissiorfiit illoqarfinni sullitatik digitalikkut namminneerlutik aaqqiissutissarsiortittalerniarpaat, digitalikkut aaqqiissutissat ingerlatseqatigiiffimmit ineriartortinneqarsimapput. Allaffimmut ornigullu saaffiginnittarneq qaammatip matuma naanerani illoqarfinni 17-ini atorunnaarsinneqassaaq.
- Nukissiorfinni atuisunik sullissineq pitsaanerusoq aamma allaffissorneq annikinnerusoq, Nukissiorfinnit nunami ornigulluni saaffiginnittarnermik matusinikkut annertuumik sipaaruteqarniartunit nalunaarut taamatut nipeqarpoq.
Tusagassiorfinnut nalunaaruteqarnermi allassimavoq, ”digitaliseriineq annertunerusoq atorlugu atuisartunik pitsaanerusumik sullinneqarnissaat qulakkeerneqarpoq aamma Nukissiorfiit isumalluutai pitsaanerusumik atorneqarlutik, ilaatigullu ataavartumik nukissiamik pissarsiffiusinnaasunut nuukkiartornermut atorneqarsinnaallutik, tamannami Naalakkersuisut aamma Nukissiorfiit anguniagaannut qitiuvoq”.
Digitalikkut periarfissat
Nukissiorfiit ilisimatitsissutigaat ukiaru akiligassiissummik SMS aqqutigalugu pissarsisoqarsinnaanissaa aamma atuisunngorneq aamma atuisuujunnaarneq soorlu assersuutigalugu imermik pajunneqartarnermi SMS aqqutigalugu pisinnaalissasoq. Tamatuma atuisartut Nukissiorfinnut ornigullutik saaffiginninnissaat pisariaqarunnaarsissavaa tamatumunngalu ilutigitillugu Nukissiorfiit allaffissornermi aningaasartuutinik sipaaruteqassapput. Atuisartut smartphone-mik peqartut aammattaaq periarfissaqalissapput ilaatigut akiliisarnermut tunngasunik nutaanik. Atuisunngornermi aamma atuisuujunnaarnermi nalunaaruteqartarneq digitalimik Sullissivik aqqutigalugu akeqanngitsumik ingerlanneqarsinnaavoq, akerlianik allattuilluni immersuilluni periuseq allaffissornermilu oqimaatsoq atoraanni akitsuummik akiliisitsisoqartarpoq, ingerlatseqatigiiffik nalunaaruteqarnermi ilisimatitsivoq.
Digitalimik atuisoqalerneratigut, ingerlatseqatigiiffiup aningaasartuutigisartagai 4,5 millioner koruuninik annikinnerulissapput. Akerlianik it-mut atortunik softwarenillu nutaanik pisiaqarsimaneq taamaallaat miliuunit affaanik naleqarput.
Ukiumut inuit 13-it suliarisinnaasaannik sipaagaqarneq
- Naatsorsorsimavarput ukiumut inuit 13-it suliarisinnaasaasa nalingannik sipaaruteqassalluta, aningaasaqarnermut pisortaq Claus Andersen-Aagaard Sermitsiaq.AG-mut ilisimatitsivoq.
Taassuma ilisimatitsissutigaa, ingerlatseqatigiiffiup illoqarfinni allaffeqarfiinut ornigulluni saaffiginnittarneq aggustusip 31-ani matuneqassasoq. Allannguutilli nunaqarfinnut tunngatillugu atuutissanngitsut. Nunaqarfinnili innuttaasut allat assigalugit digitalikkut aaqqissutissanik atuinissamut periarfissaqarnerarpai.
- Nuannaarutigaarput atuisartutsinnut tamanut aaqqiissutit digitaliusut neqeroorutigisinnaagatsigit, naak aamma taakkua ilaat smartphoninik peqanngikkaluartut aamma internetimut isersinnaannatik, aningaasaqarnermut pisortaq digitalikkut neqeroorutit malitsigisaannik sullitat oqinnerusumik ulloqalernissaannik isumaqartoq oqarpoq.
Nukissiuutinut mingutsitsisanngitsunut aningaasat amerlanerusut
- Allannguutissat pilersaarutaasut aammattaaq kingunerissavaat allaffissornermi sullissinerup annikinnerulernera, atuisartunut taamatuttaaq Nukissiorfinnut aamma taamaattumik aaqqiineq tamanna tamanut iluaqutaavoq, Claus Andersen-Aagaard sipaaruteqarnikkut ingerlatseqatigiiffik nukissiuutinut ataavarnerusunut allanngortitsinissamut akissaqarnerulissasoq pillugu nalunaaruteqartoq oqarpoq.