Nukissiorfiit: Anorersuarnerani qamittoortoqaratarsinnaasoq
Nuummi anorersualerpoq, unnuarulu anoraasuartarnerit 33 m/s-itut sakkortutigisassallutik. Nukissiorfiit maanna nalunaaruteqarput attaviit iluarsineqarallarsimasut qerinnarneranut anoraasuarnernullu qajannarsinnaasut.
Nuummiut silap qanoq inneranut maniguulluinnartariaqarput.
Nukissiorfiit taama nassueruteqarput anorersuarneranilu piffissaq kingulleq assigalugu innaallagiaaruttoqartarsinnaanera maanna nalunaarutigalugu.
Oqartussanit ippassaq nalunaarutigineqaraluarpoq Nuummi innuttaasut innaallagiamik naliginnaasumik atuisinnaalersut, attaviit akornutaat iluarsineqarmat. Aaqqiinerli aaqqiigallarneruvoq, Nukissiorfiillu aasamut iluarseeqqittussallutik.
Allaaserisap suliarinerani anorersuaq kujataanit tikiussimalerpoq.
- Iluarsiigallarneq aaqqiissutissani pitsaanerpaavoq, suleqatigiilluarnermilu pilertortumik suliarineqarnera nuannaarutigaarput. Nunatsinnili ilisimaneqartutut sila naalagaavoq, issittumilu ajornartoornernut sunulluunniit piareersimasariaqarpugut, Nukissiorfinni nukissiornermut pisortaq Kaspar Mondrup tusagassiorfinnut nalunaaruteqarluni oqarpoq.
Iluarsiigallarneq qajannartoq
DMI-p silassamik ilimasaarutaa naapertorlugu anorersuarnerani sapaatip unnuaani anoraasuartarnerit 33 m/s-itut sakkortutigisassangatinneqarput.
Nukissiorfiit ilisimatitsipput iluarsiissutigineqarallartut qerinnarneranut anoraasuarnernullu qajannartut.
- Nuuk naliginnaasumik pilersorneqalereeraluartoq, Nukissiorfiit suli upalungaarsimapput, akornuteqartoqalissagaluarpallu piareersimallutik, Nukissiorfiit allapput.
Nuuk sapaatip akunnerata ingerlanerani arlaleriarluni qamittoorpoq, sivisunerpaamik akunnerit 18-it innaallagiaqarani. Tamatumani nuna tamakkerlugu oqarasuaatinut internetimullu attaviit aamma eqqorneqarlutik.