pisortaq nutaaq

Nukissiorfiit RAL-meersumik aningaasaqarnermut pisortartaarput

Claus Andersen-Aagaard Nukissiorfinni aningaasaqarnermut pisortanngorpoq. Claus Royal Arctic Line A/S-imi controllerinut pisortatut atorfimmeersuuvoq, aggustimilu Nukissiorfinni sulilissaaq.

Claus Andersen-Aagaard er ny økonomidirektør ved Nukissiorfiit.

Claus Andersen-Aagaard Nukissiorfinni aningaasaqarnermut pisortatut aggustip 14-anni suliartoqqaassaaq.

Claus Royal Arctic Line A/S-imi controllerinut pisortatut atorfimmeersuuvoq Kalaallillu Nunaanni ukiut tallimat missaanni najugaqarsimalluni.

- Uanga Nukissiorfinnut pinissara, kiisalu Kalaallit Nunaanni pilersuinermut attaveqaasersuutinik pingaaruteqarluinnartunik suli ineriartortitseqqinnermut tapertaanissara, assut qilanaarivara, Claus Andersen-Aagaard oqarpoq.

- Ingammik qilanaarivara aningaasaqarnermut tunngatillugu niuernerpalaarnermut tapertaanissaq aammattaaq inunnik ineriartortitsinissaq toqqissisimanartumik avatangiiseqarluni, taamaaliornikkut immikkoortortaqarfinni suleqatigiit imminnut ataqatigiissutut aamma ingerlalluartutut atuutilissammata. Neriuutigaara Vestas Wind System-imi aamma Royal Arctic Line A/S-imi misilittakkakka atorlugit Nukissiorfiit pitsaasumik aamma pissanganartumik ineriartornissaa peqataaffigisinnaassallugu.

Pisortaq nuannaartoq
Nukissiornermi pisortaanerup Michael Pedersenip atorfinitsitsineq naammagisimaarpaa.

- Aningaasaqarnermut pisortatut atorfiup inuttalerneqarnerani pingaartissimavarput piukkunnartumik nassaarnissarput Nukissiorfiit suliffeqarfittut niuernerpalaartumik aamma ataavartumik tunngaveqarluni ineriartornerani ineriartortitseqataasinnaasumik, Nukissiorfiit pisortaanerat Michael Pedersen nalunaarpoq.

- Clausi ukiuni arlalinni kalaallit suliffeqarfiutaannik allamik ineriartortitsinermik suliaqarsimavoq angusaqarluarluni. Qilanaaraarput Clausip aningaasaqarnermi, niuernermi ineriartortitsinermi aamma sulisunik ineriartortitsinermi piginnaasai pitsaasut atulernissaat, Nukissiorfiit ineriartortinneqarnerannik pitsanngorsaanissamut sullittakkatsinnut iluaqutaasumik, nukissiornermi pisortaaneq Michael Pedersen oqarpoq.

Powered by Labrador CMS