Nukissiorfiit qullersaqarfitsik ammaqqippaat
Nukissiorfiit Nuummi qullersaqarfia sivikitsumik matoqqatinneqareersoq sulisut amerlanersaat suleqqilersimapput.
Nukissiorfiit qullersaqarfiat marlunngormat matuneqarpoq, sulisoq ataaseq coronavirusimik tunillatsissimasoq paasineqarmat.
Pingasunngornermili sulisut amerlanersaat suleqqilersimapput, Nukissiorfiit Sermitsiaq.AG-mut ilisimatitsipput.
Sulisoq tunillatsissimasoq ataasinngormat nalunaaquttap akunnialuini allaffimmiissimavoq, suleqataasullu tunillatsisimasumut qanillisimasut coronalerisunit attavigineqarsimallutik.
- Tunillatsissimasinnaasunik misissuisut sulisut ataasiakkaat angerlarsimaannaqqullugillu misissortikkiartoqqusimavaat. Soorunami tamanna malissimavarput, Nukissiorfiini aqutsisut allattoqarfianni pisortaq Sune Taugaard mailikkut allappoq, nangillunilu:
- Ullup ingerlanerani allaffipput immikkut eqqiarluarneqarpoq, nalilersimavarpullu aqagu suliartoqqinnissaq illersorneqarsinnaasoq.