Nukissiorfiit nunaqarfinni pingasuni pilersuisalissapput
Kangerlussuarmi, Narsarsuarmi Qaarsunilu nukissiuutinik imermillu pilersuinissamik akisussaaffik Mittarfeqarfimmit Nukissiorfimmut tunniutissallugu Naalakkersuisut aalajangersimapput.
Nukissiorfiit innaallagissamik, imermik kiassarnermillu innuttaasunut pilersuisarnera nalinginnaasuuvoq. Nunaqarfinnili pingasuni, tassa Kangerlussuarmi, Narsarsuarmi Qaarsunilu maannamut pilersuisimanani.
Nunaqarfiit pingasut taakku pingaarutilinnik timmisartoqarfeqarput, mittafinnillu ingerlatseqatigiiffik Mittarfeqarfiit sumiiffinnut pingasunut taakkununnga pilersuisuusimalluni.
Naalakkersuisullu pilersuinermik akisussaaffik Mittarfeqarfinniit Nukissiorfinnut nuunneqassasoq aalajangersimapput:
- Pilersuineq Nukissiorfiit qitiusumik suliassarimmagu sumiiffinni pineqartuni innaallagissamik, imermik, kissamillu pilersuinermik Nukissiorfiit tigusinissaa pissusissamisoorpoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund (IA) tusagassiorfitsigut nalunaaruteqarnermi oqarpoq.
Mittarfinnik ingerlatsineq ukkatarineqalissasoq
Ineqarnermut Attaveqaasersuutinullu Naalakkersuisoq Erik Jensen (S) ilanngussilluni oqarpoq, qitiusumik suliassat isumagineqarfissaminni isumagineqartalernissaat pissusissamisuuginnartoq:
- Aalajangiinerup kingunerisaanik, pisortat nukissiuutinik imermillu pilersuinerini Mittarfeqarfiit nunatsinni sumiluunniit akisussaaffeerutissaaq. Taamaalilluni mittarfinnik ingerlatsinerup ukkatarinissaanut Mittarfeqarfiit periarfissaqalissaaq, Erik Jensen oqarpoq.
Naalakkersuisunit oqaatigineqarpoq, sumiiffinni assigiinngitsuni sulisut tunniussinissaq pillugu ilisimatinneqareersut, tunniussinermullu atatillugu atorfeqarnerisa Nukissiorfimmut nuunneqarnissaannik neqeroorfigineqarlutik. Sumiiffinni pineqartuni atuisut ukioq nikitsinnagu tunniussineq pillugu aamma ilisimatinneqassasut.
Mittarfeqarfiit aaqqissuussaanera Nuummi, Ilulissani Qaqortumilu timmisartoqarfiliortoqarnera pissutigalugu allanngortiterneqarpoq. Timmisartoqarfissat pingasut taakku Mittarfeqarfinnit nunami timmisartoqarfinnik qulimiguulinnullu mittarfinnik ingerlatsisumit pinnatik, Kalaallilli Airportsimit pigineqarlutillu ingerlanneqartuupput.
Mittarfeqarfiit aktiaatileqatigiiffinngortinneqarnissaat Kalaallit Airportsimullu ilanngutsinniarlugit inatsisissatut siunnersuut upernaakkut ataatsimiittoqarnerani tunuartinneqarpoq, taamaammallu ingerlatseqatigiiffiup aaqqissuussaanerata siunissamit qanoq isikkoqarnissaa suli ilisimaneqarani.