Nukissiorfiit nalunaarutertik pillugu ajuusaartut
Nukissiuutileqatigiiffimmit erseqqissaatigineqarpoq, innaallagissamut akigititap qaffanneqarnissaanut Naalakkersuisut kisimik aalajangiisinnaasut, nalunaarutigisartillu politikkikkut ingerlatsinermut akuliunnertut paasineqarsinnaasoq ajuusaarutigalugu.
Nukissiuutileqatigiiffik, Nukissiorfiit, Namminersorlutik Oqartussanit pigineqartoq qaammammi matumani siusinnerusukkut tupaallannartumik nalunaaruteqarpoq:
- Kalaallit Nunaanni inoqutigiit tamarluinnarmik 2024-miik akilertagaat agguaqatigiissillugu ukiumut 928 kr.-nik qaffassapput, erngup nukiliorfia ullumikkumiit annikinnermik innaallagissiortariaqalissammat. Tamassuma kingorna ukiuni akit suli qaffaqqissapput, Nukissiorfinni nukissiuuteqarnermut pisortaq, Kaspar Mondrup taamanikkut oqarpoq.
Akit qaffanneqarnissaannut pissutaatinneqarpoq, Utoqqarmiut Kangerluarsunnguanni erngup nukinganik nukissiorfik allilerneqanngippat, nunami tamarmi innaallagissap akisunerulernissaa.
Nukissiuutileqatigiiffilli maanna tunuarterpoq:
- Salliutillugu nukissiuutinik pilersuinermi siunissami pingaanersiuinissanut suli
oqallisigineqanngitsunut politikkikkut ingerlatsinermut piffissaanngitsukkut
akiliunnertut paasineqarsinnaammat – paasineqarnikuummat.
Naalakkersuisut akigititassamik aalajangiisuussasut
- Aamma tusagassiuutinut nalunaarut Nukissiorfiit innaallagissap akianik
aalajangiisartuusut paasineqarsinnaammat ajuusaarutigissavarput, Nukissiorfiit nutaamik nalunaaruteqarlutik allapput.
Ingerlatseqatigiiffiup tassunga atatillugu erseqqissaatigaa, Nukissiorfiit suliffeqarfiummat nammineertitaq, soorunami Naalakkersuisut kisimik innaallagissap, erngup kiaallu akianik aalajangiisartut.
- Tusagassiuutinut siusinnerusukkut nalunaarummi Nukissiorfiit kissaatigisaat tassaaginnarpoq Utoqqarmiut Kangerluarsunnguanni imermit nukissiorfik imissaarutissappat kingunerisinnaasaannik ajortunik oqaluttuarnissaq, Nukissiorfiit ilanngullugu allapput.
Ingerlatseqatigiiffik nalunaarumminut nutaamut itisiliitiniarlugu Sermitsiaq.AG-mit apersorneqarumagaluarami piumasimanngilaq.
Naatsorsuisimanerit nutarterneqarsimanngitsut
Nukissiorfiit ilanngullugu erseqqissaatigaat, Utoqqarmiut Kangerluarsunnguanni imermit nukissiorfiup allilernerani, Nuummi nuna tamakkerlugu ikuallaavissamit kiammik sinnerusuttumik atuinermi aamma Qasigiannguani Aasiannilu imermit nukissiorfimmik
sanaatornermi inuiaqatigiinnut kingunissaanik nutartikkanik suli
naatsorsuisoqarnikuunngitsoq.
- Naatsorsuinerit isumaqatigiinniarnissanut aalajangiinissanullu tunngatillugu
soorunami pingaaruteqarput, Nukissiuutileqatigiiffik erseqqissaavoq.