Nukissiorfiit minguinnerusumik nukissiuuteqalernissamut piareersartut
Nukissiorfinnit tupaallaataanngitsumik Inatsisartut erngup nukinganik nunap nukissiuuteqarnissaanut aningaasaliissuteqarnissaq akuerimmassuk naammagisimaarinnipput. Maanna minguinnerusumik nukissiuuteqalernissamut sulissuteqartoqassaaq, nukissiorfimmi pisortaq oqarpoq.
Qasigiannguit Aasiaallu eqqaanni nutaamik imermik nukissiorfiliornissaq aammalu Utoqqarmiut Kangerluarsunnguanni imermik nukissiorfioreersumik allilerinissamik aalajangiineq silap pissusia inuiaqatigiillu ineriartornissaat eqqarsaatigalugit nutaarsiassaavoq avaqqutassaanngitsoq. Taamatut isumaqarpoq Nukissorfiit pisortaat Kaspar Mondrup.
- Aalangiineruvoq eqqornerusinnaanngitsoq, uagullu tulluusimaarlutalu nuannaarpugut inuiaqatigiinnut atasinnaasumik tunngaveqarlutik piorsaasunut, uagut nammineq nukissiornitsinnik tunngavilinnut, ingerlatsisuulluta akuusinnaagatta, Kaspar Mondrup aalajangiisoqarmat oqarpoq.
Erngup nukinganik nukissiorfiit nutaat atuutilerpata, pisortat ataavartumik nukissiornerat ullumikkut 70 procentiusumiit 90 procentinut qaffassaaq. Nunami nukimmik atuineq ataatsimut isigalugu, 17-18 procentit missaanniit 35 procentit missaannut qaffassaaq.
Nukimmik minguinnerusumik pissarsisoqarsinnaassasoq
Pisortap Sermitsiaq.AG-mut erseqqissaassutigaa, Utoqqarmiut Kangerluarsunnguanni nukissiorfiup allilerneqarneratigut aamma Qasigiannguit/Aasiaat eqqaanni nutaamik nukissiorfiliortoqarneratigut sumiiffinni allani minguinnerusumik nukissiortoqalernissaa pisariaqassasoq.
- Tunisassiorsinnaanerput annertusippat nukimmik sinneruttumik allat pissarsisinnaanerat qulakkeertariaqarparput, Kaspar Mondrup oqarpoq.
Tassa illut ullumikkut kissarsuummik uuliatortumik kiassarneqartartut erngup nukinganik nukissiorfimmiit innaallagissamik tigusisalernissaat piareersarneqassaaq. Nukissiorfimmi pisortaq naapertorlugu, tamanna pisariuvallaarnavianngilaq. Illup ataatsip uulia atorlugu kiassarneraniit innaallagiaq atorlugu kiassarneqartalernissaa pineqassappat. Nukissiorfiit tamatumunnga aningaasartuuteqarnissamut piareersimapput - aamma inuit namminneq illuutaanni.
- Kissarsuut uuliatortoq imermik kiassaammiittumik aalajangersimasumik kiassuseqalersitseqqaarluni aallartittartoq, uunnaavimmik sarfatortumik ikkussifigissavarput. Taamaalilluni kissarsuummik uuliatortumik kiassaasoqartarunnaarluni uunnaavik sarfatortoq atorlugu kiassaasoqartalissaaq, taanna oqarpoq.
Kissarsuutit uuliatortut illut eqqaaniisiinnarneqassapput, aatsaallu sumiiffinni pineqartuni innaallagiaq qamikkaangat taakku aallartassallutik.
Kissarsuut uuliatortoq sillimmatitut
Angerlarsimaffiit ataasiakkaat taamaalillutik kissarsuummik sillimmateqalissapput, Nukissiofiillu erngup nukinganik nukissiorfiit ajutuussagaluarpata kissarsuummit uuliatortumit innaallagissamik pilersuisariaarutissallutik.
- Maanna taamaalilluta nukissiornitta annertuseriasaarnerani ajutoortoqariasaaraluarpat kiassaateqarfivut uuliatortut allilertariaqassanngilagut, Kaspar Mondrup oqarpoq.
Nukissiorfiit CO2-mik aniatitsinerat
2020-mi 86.000 tonsit aniatinneqarsimapput.
Nukissiorfiit nutaat atuutilerpata 66.000 tonsinik aniatitsisoqarnissaa naatsorsuutigineqarpoq.s
Nukissiorfiit maanna atuuttut 2020-mi Nukissiorfiit CO2-mik 148.800 tonsinik annikinnerusumik aniatitsisissimavaat. Tamanna dieselimik atuinermut naapertuuppoq, pilersuineq erngup nukinganik pinnani dieselimik atuinermit pisimasuuppat.
Nukissiorfiit inuinnaat angerlarsimaffiisa uuliatortunik kiassaatillit saniatigut, suliffeqarfiit angisuunik illutallit uuliatortumik kiassarneqartut aamma innaallagiartortunik kiassaateqalernissaat piarersaassavaat. Tassa kiassaatit uuliatortut innaallagiartorunik kiassaasersorneqassapput, erngup nukinganik nukissorfinniit kiassarneqalissallutik sulilu kiassaat uuliatortoq sillimmatigineqassalluni.
Biilinut innaallagiartortunut immiisarfiit amerlanerusut
Nukissiorfiit biilinut innaallagiatortunut immiisarfiit, Nukissalik, ukioq manna atuutsilersimavai. Kommuneqarfik Sermersooq suleqatigalugu Nuummi immiisarfinnik sisamanik ikkussisimavoq, naatsorsuutigineqarporlu 2021-mi illoqarfimmi immiisarfinnik allanik marlunnik ikkussisoqassasoq. Taamatuttaaq Qaqortumi Narsamilu ikkussisoqassalluni.
Nukissiorfiit aamma suliffeqarfinnut, piginneqatigiiffinnut innuttaasunullu namminneq biilinut uninngasarfiutilinnut immiisarfiliinissamik neqerooruteqarsimapput, pisortaq ilisimatitsivoq.
- Siunertaavoq illoqarfinni erngup nukinganik nukissiorfilinni tamani immiisarfiliinissaq. Nuummi siuarsimanerpaaginnarpugut, kommunip suliniuteqarluarsimanerata malitsigisaanik, Kaspar Mondrup ilisimatitsivoq.