Skip to main content

Nukissiorfiit aktieselskabinngortillugu

Kristian Jeremiassenip Nukissiorfiit aktieselskabinngortinnissaa qineqqusaarnermut ilannguppaa

Kristian Jeremiassen, Siumut tunuliaqutaralugu Inatsisartunut qinigassanngortittoq, isumaqarpoq inuiaqatigiinnut iluaqutaalluassasoq Nukissiorfiit aktieselskabinngortinneqarpat.

Taanna aamma isumaqarpoq selskabimut pitsaanerussasoq aningaasanut inatsimmit aningaasaliissutinik isumalluuteqanngippat.

Tamatumunnga atatillugu erseqqissarpaa Nukissiorfiit aktieselskabinngortinneqarnera nunaqarfinni isorliunerusunilu assigiissumik akeqartitsinermut kinguneqassanngitsoq, imaluunniit Landskarsip selskabimut tapiissutaanik attuissanngitsoq. Assigiissumik akeqartitsineq suli politikkikkut aalajangerneqartassaaq, aamma aktiselskabinngortitsinerup kingorna, taanna tikkuaavoq.

– Taammattorli Nukissiorfiit aktieselskabenngortinneqarnera pisortat aningaasaqarnerannut sunniuteqassaaq, tassami ukiuni tulliuttuni pingasuni sisamaniluunniit pisortat 3- aamma 400 mio. kr.-nit akornanni aningaasaateqarnerulissammata, sanaartugassanummi atugassanik Nukissiorfiit aningaasanik Nunatta Karsia avaqqullugu atorniartalissammata.

Nukissiorfiit aktieselskabinngortinneqarnissaanut pilersaarusiornermut najoqqutassiami kingullermi ullumikkornit suliamut tulluarsagaanerusumik Nukissiorfiit ingerlanneqarlernissaat innersuussutigineqarpoq. Pilersaarusiornermut najoqqutassiami tassani aamma kommuneqarfiit Nukissiorfimmik piginneqataalernissaat innersuussutaavoq, kommuneqarfiit Nukissiorfiullu akornanni ataqatigiissarinerup pitsaanerpaamik ingerlanneqarnissaa siunertaralugu.

Siunertassalik

Kristian Jeremiassen isumaqarpoq Nukissiorfiit ingerlaavartumik aningaasaliinissanut pilersaarusiortarnerat eqqarsaatigilluagaasumik pilersuinermullu ataatsimut isigalugu pisassasoq, pilersaarusiortarneq piviusunngortitsisarnelu sanaartornernik ukiuni 40-nit 50-inut siumut isigaluni politikikkut ukiumiit ukiumut Nunatta Karsiata Aningaasanut Inatsisaata aningaasatigut inissisimasarneranut qilersorsimanngitsuusariaqarpoq.

Nukissiorfiit ulluinnarni illoqarfinni 17-ini nunaqarfinnilu 53-ini innallagissamik, imermik kiassarnermillu tunisassiorlutillu tunisaqartarput.

– Akit annerpaaffissat minnerpaaffissaallu naalakkersuisunikkut aalajangerneqartarnerat pissutigalugu, Nukissiorfiit tunisassiornermut tuniniaanermullu akitigititaat naalakkersuinikkut naapertuuttumik aalajangersarneqartarput, taanna naliliivoq.

– Nukissiorfiit aktiaatileqatigiiffinngortinnginneratigut sinaakkutit taamaaginnartinneqarnerat, innaallagissap, erngup kiassarnerullu sapinngisamik akikinnerpaamiitinnissaanut naalakkersuinikkut anguniakkanut naapertuutissaaq. Nukissiorfiilli aktiaatileqatigiiffinngortinneratigut sinaakkutinik allannguinikkut, Nukissiorfiit ungasinnerusumut pilersaarusiornissamik periarfissaqalissapput, taamaalillunilu ukiuni aalajangersimasuni aningaasaliissutigineqartussat naalakkersuinikkut aalajangerneqartarunnaassallutik, Kristian Jeremiassen oqarpoq nangillunilu:

– Taamaaliorneq eqaallisaataassaaq, sanaartornissamut pilersaarutit siuartinneqartarnerat kinguartinneqartarnerallu suliamut tunngasumik piviusorsiortumillu tunngaveqarluni aalajangerneqartalissalluni.

Piffissamilu aalajangersimasumi pisariaqartitsineq aallaavigalugu aki appasinnerpaaffissaminiittoq atorlugu kiffartuussinermut sinaakkusiineq ingerlanneqassalluni.

– Assersuutissaqqinnerpaavoq Tele Greenland A/S-ip piginneqatigiilluni ingerlatsivinngortinneqarnera taassumalu kinguneranik akiusut ingerlaavartumik appariartortinneqarsimanerat, taanna tikkuaavoq.

– Nukissiorfiit aktiaatileqatigiiffinngortinneqarneratigut ingerlatseqatigiiffik aningaasaliisarnerni pissutsinut nalinginnaasunut ilanngutissaaq, taamaalillunilu Nunatta Karsianit taarsigassarsinani aningaaserivimmi taarsigassarsisalissaaq. Tamanna Nunatta Karsianut ukiuni pingasunit sisamanut tulliuttuni ISA-mik angusaanut 300-400 mio. kr.-illu akornanni angusarissaarnerulerneranik kinguneqassaaq.

Ingerlatsivik akiitsoqalersissanngilarput

– Taamaattoq tassunga atatillugu erseqqissassavara piginneqatigiiffinngortitsineq suliffeqarfimmut akiitsoqalersitsinermik siunertaqassanngimmat, Nunatta Karsianiit atukkat aningaaserivinnut nuutiinnarlugit taamaaliornikkullu atukkat annerusumik erniaqalersissinnaanngorlugit, tamannami atuisunut akitsorsaataaginnassammat.
DAU-mi killiffik pitsaanerusoq kiffartuussinikkut pitsanngorsaanissanut aningaasaleeqqinnernut atorneqartussaassaaq Nukissiorfiit susassaqarfiisa iluani kiffartuussinikkut atortulersuutit eqqarsaatigalugit.

– Taamaattumik erseqqissaatigilara: Nukissiorfiit aktiaatileqatigiiffinngortissanngilarput Aningaasanut Inatsimmi DAU-p killiffia pitsanngorsarniarlugu ingelatsinermilu ingerlaavartumik aningaasartuutit annertusillugit. Taamaaliorneq nunatta aningaasaqarnera eqqarsaatigalugu akisussaassuseqanngitsuliornerussaaq.

Suliffeqarfimmik allanngortitsinerup siunertarissavaa nukissiornermi attuumassutilinnik ingerlatsinermi pitsanngorsaanissaq; pisortat aningaasaataannik atuinerulersitsinngutsumik imaluunniit pisortat akiitsuinik annertunerulersitsinngitsumik.

Atukkiussat aningaasaliissutaassapput

– Suliffeqarfiup allanngortinneqarnerani nalilersoqqissaatariaqarpoq aningaasat ullumikkut Nukissiorfinnut sanaartornernut ingerlatsinermullu atukkiunneqartartut aningaasaliissutitut tunniunneqassannginnersut aktiaatileqatigiiffittut aallartinniarneqarneranut atatillugu.

– Akisussaassuseqanngitsuliornerussaarmi Nukissiorfiit piginneqatigiiffittut ingerlaleruni sanaartukkat tamatta pigisavut qularnaveeqqutitut atorlugit aningaasanik ingerlatsinissamut atugassaminik atorniassaguni.

Kristian Jeremiassen isumaqarpoq aktieselskabinngortitsinermi pissutsit makku ingerlatsiviup ingerlanneqarnerani pitsaanerusunik sinaakkutassaqartitsissasut:

* Naalakkersuinikkut ingerlatseqatigiiffeqarnermullu inatsiseqarnikkut akisussaaffiit erseqqissumik avissaartinneqarnerat.
• Siulersuisut aqutsisullu aqqutigalugit aalajangiisinnaatitaanerup aqutsisutullu akisussaanerup erseqqissumik nassuiarneqarnerat.
• Sanaanut sanaartukkanillu ingerlatanut pilersaarusiornerup piffissaliivigineqarnerata patajaallisarneqarnera.
• Aalajangiiniarnermik suliaqarneq pisariillisarneqassaaq.
• Ingerlatsinermi pitsaanerusumik ingerlasinnaaneq maannakkumiit namminersortitaalluni ingerlatsinermiit.
• Suliffeqarfiup naatsorsuutaanik ullumerniit pitsaanerusumik malittarinnissinnaaneq aktianik piginneqatigiilluni inatsisip peqqussutai malillugit.

– Naggataatigut ilassutigissavara politikikkut suliffeqarfiup aqunneqarnera ataannassammat, Naalakkersuisut piginneqatigiiffiup ataatsimeersuarneranut siulersuisunik toqqaasussaatitaanerat tunngavigalugu. Naalakkersuisut qaqugukkulluunniit Nukissiorfiit akigititai ingerlanneqarneranullu aningaasartuutissatut tapiissutaasinnaasut aalajangiivigisassavaat, Kristian Jeremiassen oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER