Nukissiorfiit akigititanik appaasut
Nukissiorfiit kiassarnermut akigitinneqartumik appaanissaat Naalakkersuisunit akuerineqarsimavoq.
Kiassarneq avatangiisinut mingutsitsinngitsoq erngup nukinganik nukissiorfinniit innaallagissamik pilersorneqartarpoq, ungasianiillu kiassarneq namminersortut kiassaanermik pilersuisarnerannut akitigut unammillersinnaasariaqarluni.
Taamaammat Naalakkersuisut Nukissiorfiit ungasianit kiassaanermut, innaallagissamik kiassaanermut aalajangersimasumut kiassaanermullu qaminneqarsinnaasumut akitititat apparneqarnissaat akuerisimavaat.
- Tamanna pivoq Polaroilip aasaaneranut sulinngiffeqarneq sioqqullugu uuliap akianik appartitsinerata kingunerisaanik akit appartinneqarneranni iluanaarutaasoq sullittakkanut toqqaannartumik ingerlateqqinneqarneratigut, Nukissiorfiit nittartakkamikkut allapput.
Akigititat nutaat
Kiassaaneq aalajangersimasoq appartinneqarpoq 740 kr.-init/MWh 710 kr.-imut/MWh. Aalajangersimasumik kiassaanermi pineqarput ungasianit kiassaaneq nalinginnaasoq aamma innaallagissamik kiassaaneq aalajangersimasoq.
Qaminneqarsinnaasumik kiassaaneq appartinneqarpoq 680 kr.-init/MWh 490 kr.-imut/MWh. Kiassaanermi qaminneqarsinnaasumi pineqarput innaallagissamik kiassaaneq qaminneqarsinnaasoq aamma ungasianit kiassaaneq qaminneqarsinnaasoq.
Kiassaanermik atuisartoq innaallagissamik kiassaanermik qaminneqarsinnaasumik atuisup ukiumut agguaqatigiissitsilluni kiassaanermut aningaasartuutai 3.800 kr.-t missaannik appassapput, atuisartullu innaallagissamik aalajangersimasumik atuisut (inaallagissamik aamma ungasianik kiassaanermik) ukiumut aningaasartuutaat 600 kr.-t missaannik appassapput.
Pissarsiffik: Nukissiorfiit
- Akit appartinneqarnerisa atuisartut kisiisa iluaqusinngilai. Mingutsitsinnginnerusumut nuukkiartorneq aammattaaq iluaquserneqassaaq kiisalu naatsorsuutigineqarpoq Nukissiorfiit aningaasaqarneranut tamanna iluaqutaassasoq, tassami ilimagineqarmat sullittakkat kiassaanermut qaminneqarsinnaasumut nuunnissaat akigitinneqartut appartinneqarnerisa kingunerisaanik, ingerlatseqatigiiffimmit oqaatigineqarpoq.
Amigartooruteqarluni ingerlasoq
- Nuannaarutigaarput Naalakkersuisut kiassaanermut akigitinneqartunik appartitsiniarlutik aalajangersimanerat. Tamatuma kingunerisaanik kissarsuummik uuliatortumik privatimik kiassaanermut taarsiunneqarsinnaasoq Nukissiorfinnit kiassaaneq akikitsoq, orniginartoq aamma piujuaannartitsisoq neqeroorutigisinnaalerpaat. Neriuutigaarput sullittakkatta amerlasuut maluginiassagaat innaallagissamik kiassaanermut qaminneqarsinnaasumut akigititavut appasinnerusut, taamaalillutillu mingutsitsinngitsumik aaqqiineq toqqarlugu, Nukissiorfinni pisortaaneq Kaspar Mondrup oqarpoq.
Innaallagissamik kiassaaneq qaminneqarsinnaasoq illoqarfinni erngup nukinganik nukissiorfeqartun,, soorlu Nuummi, Tasiilami, Qaqortumi, Narsami, Sisimiuni Ilulissanilu taamaallaat tuniniarneqartarpoq.
Ukioq manna siusinnerusukkut saqqummiunneqarpoq, assigiimmik akeqartitsinerup malitsigisaanik Nukissiorfiit amigartooruteqangaatsiarsimasut aamma ingerlatseqatigiiffimmi aningaasaqarneq ajorluinnartoq, tassa Nukissiorfiit nunami tamarmi assigiimmik akeqartitsisussaanerat pissutigalugu.
Sermitsiaq.AG-mit akigititat appartinneqarnerisa ingerlatseqatigiiffiup aningaasaqarneranut qanoq sunniuteqarsinnaanersut pillugit Nukissiorfiit oqaaseqartinniarneqarput.