Nukappissat angallammik angallanneqartut
Nuummit Qeqertarsuup Tunuanut angallammikangalatinneqarneq nukappissanut arfineq-marlunnut, najugaqarfimmi Timi Asimimeersunut,inuunerinnerulersitsivoq.
Imarsiortutut inuuneq nalissaqanngilaq, inuusuttut sumiginnarneqarsimasut inersimasutut inuunermi unammilligassanut piareersarlugit, asannittumik eqqortumut ingerlatinniassagaanni. Taamatut isumaqarpoq Nuummi najugaqarfimmi Timi Asimimi pisortaq, taassumalu pilersinneqarnissaanik suliniuteqarsimasoq, Kim Godtfredsen.
Aviisi Sermitsiaq taama allappoq.
Najugaqarfimmi ullumikkut nukappissat arfineq-marluk najugaqarput, taakkualu siusinnerusukkut alapernaarsuuteeraasimasumik Tulugaq-mik, ullumikkut Tulu-mik atilimmik, Ellen aamma Anders Pedersenimit pigineqartumik, Qeqertarsuup Tunuanut angalaqqammerput.
– Sivikinnerusumik sivisunerusumillu angallammik angalatitsinerit peroriartortitsinermut atortarpavut. Angallammi inuuneq pissanganartuuvoq, pisariaqarporli aaqqiissuussamik, torersumillu pinissaa aammalu suleqatigiinnissamut piumassuseqarneq, taamaattumik nukappissat nuannersumik misilittagaqarfiulluartumillu, inuunerminni iluaqutissaannik misigisaqartippavut, Kim Godtfredsen oqarpoq.
– Kalaallit Nunaat imarsiortut nunagaat – kalaallillu tamarmik imaanut atassuteqarput, taamaattumik angallammik angalaneq kulturitta ilagaa. Inuit imarsiorsinnaasut, inuillu aalisarsinnaasut nunap atorfissaqartippai, taamaattumik angallammik angalatitsisarnivut nukappissanut pissarsilluarnartuupput.
– Nuannariinnarlugu angalasanngilagut. Angalaneq aamma siunertaqartussaavoq, taanna oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: