Nukâkap Sarfartuut takuteqassaassavaa
Isiginnaagassiaq nuannarineqartoq Sarfartuut Nunatsinni illoqarfinni tallimani takutinneqassaaq
Nukâka Coster-Waldau, isiginnaagassiami Strømsteder/Sarfartuut pingaarnertut inuttaq, Nunatsinni illoqarfinnut tallimanut angalassaaq.
Strømsteder/Sarfartuut Danmarkip Nunattalu akornanni pissutsit pillugit isiginnaagassiaavoq. Inuit, namminneq kulturillit kulturinillu marlunnik atuisut akornanni pisartut ajornakusoortut kusanartullu pillugit isiginnaagassiaq.
Isiginnaagassiami Nukâka Coster-Waldau angajoqqaaminut, nammineq oqaluttuarisaanerminut silarsuarmullu apeqquteqarpoq. Angajoqqaatut inuttaapput Flemming Jensen aamma Makka Kleist. Nunap inoqqaavi, anniarneq asanninnerlu. Qanga pisimasut arnap scenimiittumut sunniupput.
Aamma atuaruk: Assit: Nukâka takutitsilluartoq
Isiginnaagassiap Nunatsinni angallanneqarnera aallartissaaq oktobarip 6-anni Sisimiuni Taseralimmi nal. 19.30 oktobarillu 7-anni aamma nal. 19.30. Tamatuma kingorna oktobarip 10-anni Ilulissani Kulturip illorsuani Sermermiuni nal. 19.30, oktobarip 12-anni Qasigiannguani Timersortarfimmi nal. 19.30, oktobarip 15-ianni Aasianni Katersortarfimmi, minnerunngitsumillu oktobarip 22-anni Nuummi kulturip illorsuani Katuami nal. 19.30.