Nuannisarfik Paamiut MIO-mit nersornaaserneqarpoq

Nuannisarfik Paamiut MIO-mit ukioq manna nersornaaserneqarpoq. MIO-mit nersornaasiinermi tunngavilersuutigineqarpoq suliniutip meeqqat, inuusuttut inersimasullu toqqissisimanartumik ornitassaqartillugit sammisassaqartittarmagit.

Suliniut ukiut 25-t sinnerlugit ingerlareerpoq, meeqqanullu pitsaasumik misigisaqartitsisarlunilu ilaqutariittut pingaartitanik ilusilersueqataasuuvoq.

- Nersornaasiineq tuikkut pattalaartinnertut ililluni nersugaaneruvoq, Nuannisarfik Paamiuni
suliamut, suliamut pingaaruteqartumut, kusanartumut nersortariaqartumullu. Taamatut
innersuussisoqarneratigut pingaartissimasarput tassaavoq, kinguaariit akimorlugit
ataatsimoortitsineq aammalu meeqqat pingaaruteqartutut pingaartinneqartutullu
misigitinneqarmata, meeqqat illersuisuat Aviâja Egede Lynge nersornaasiinermi oqaaseqarpoq.

Siammarnissaa neriuutigineqartoq

Tallimanngornerit tamaasa nalunaaqutaq 19.00-imiit 22.00 tungaanut Paamiuni timersortarfik tamanut ammatinneqartarpoq. Tassani meeqqanut sammisassat, pississaarfiit, qallorfiit arsallu atorneqarsinnaasarput.

Sørine Steenholdt Nuannisaarfik Paamiut nersornaaserneqarnissaanut innersuussisuuvoq.

- MIO-p nersornaataa Nuannisarfik Paamiunut tunniunniarlik, taamaalilluni isumassarsiaq allanut siammarterniassaaq – meeqqat pinerullugit – ilaqutariillu aamma eqqarsaatigalugit, innersuussisoq tunngavilersuivoq.

MIO innersuussutinik 28-nik ukioq manna nassinneqarsimavoq, aatsaallu taama amerlatigipput. Nersornaat diplomimik imaqarpoq NunaFondenillu tapiineratigut 20.000 koruuninik aningaasartaqarluni.