Nuannarineqarluartoq Antuut 102-nik ukioqalerpoq
Ilulissani ukiorpassuarni kioskiutilik, Anthon Geisler, 102-nik ukioqalerneranut atatillugu ilaquttaminit, kammalaatiminit aamma nalunngisaminit nalliussineqarpoq utoqqaat illuanni Unganartumi ippassaq sapaatiummat.
Ukiorpassuarni kioskiutillip Anthon Geislerip 102-nik ukioqalerneranut atatillugu Ilulissani utoqqaat illuata Unganartup erfalasua amuneqarpoq ippassaq sapaatiummat.
- Nuannaarlunga ulloq atorpara. Uanga inuusunninniik sulineq nuannarisarivara, nuannaarlunga ukiorpassuit sulisimanera eqqaallugit nuannaarlunga atortarpakka, Anthon Geisler Sermitsiaq.AG-mut oqarpoq.
Illumiut Kioskimik ukiorpassuarni sulereerluni Anthon Geisler 101-nik ukioqarluni soraarninngorpoq, utoqqaat illuanni Unganartumi maanna najugaqarluni.
- Peqqilluni ullaakkut iterneq nuannertassusia immineq ikiorsinnaalluni. Naatsorsuutigisimagaluarpara 1952-imi Københavniminngaanniit Ilulissakartinnialermannga ukioq ataasiinnaq Ilulissaniissallunga, taanna qaangiuppat Danmarkimut angerlarniarlunga, oqaluttuarpoq.
Qeqertarsuup tungaanut isikkivik
- Maanna utoqqaat illuanni najugaqarpunga, ajunngitsorsuarmik pineqartarpunga. Massakkut maaniinnera eqqissisimanaralugulu nuannaarutigaara ajunngitsorsuarmillu sulisunit pineqarama. Aammalu inigisannguannit Qeqertarsuaq Aamaruutissallu isikkivigalugit ineqarfigigakkit assorsuaq nuannaraara, Anthon Geisler oqarpoq.
Anthon Geislerip inuuia aallarnerlugu tussiut 'Nersortigu Qilammiu' atorneqarpoq nalunaaqutaq 09.00. Kaffillertoqarpoq, ullup qeqqanullu piumasaanik savamik siatamik, broccolilerlugu, naatsiiat kajorsiat miseralerlugu nereqatigiittoqarpoq. Taanna pereermat sikutoqatigiittoqarpoq, flødeskumilerlugu, qillertuusanit naatitalerlugu karamelsovsitalerlugulu kinguleqqiutitortoqarluni.
Ilulissani erinarsoqatigiit aamma malunnartitseqataapput, tassani 'Naasunnguatut Illit' tussiarneqarpoq. Meeqqat atuarfianni atuartunit naasunnappoq, puisip neqaanik tuniniaareerlutik isertitatik naasut tunniussassatik Anthon Geislerimut tunniullugit, utoqqaat illuani pisortaq Rachel Reimer Jensen ilisimatitsivoq.
Mittarfimmut utimullu
- Anthon Geisler inussiarnersuuvoq nuannertuulluni. Ukiorpassuarni kioskiuteqarnikuugami qarasagippoq, tassami eqqaamallaqqittuuvoq, oqarpoq.
- Kaffillertoqarmat inuppassuit najuupput, maannakkut soorlu naasuerniaasugut naasunik Antuut tunisinnikuungaarmat. Aamma soorunami sukkulaarpassuarnik tunisippoq, Rachel Reimer Jensen oqarpoq.
Anthon Geisler biilini ilaassalluni nuannarilluarpaa, taamaammat mittarfiup aqqutaa naallugu utimullu ernutaqqiutaanit biiliunneqarluni.
Anthon Geisler 100-nik ukioqalerluni sølvimik Nersornaaserneqarpoq.