Nuannanneq pakatsinerlu: Ataatsimiititaliap 520.000 koruunit agguaappai
Qinnuteqarsimasut ilai Nuummi Najukkami Ataatsimiititaliamit itigartinneqartariaqarsimapput, allalli kulturip iluani suliniuteqarnissaminnut aningaasaliiffigineqartut maanna nuannapput.
Nuummi Najukkami Ataatsimiititaliap pingasunngornermi ataatsimiinnerminni suliniutit tallimat takillugit 520.000 koruuninik aningaasaliiffigissallugit aalajangerpaat. Nuuk Nordisk Kulturfestivalimut 300.000 koruuninik qinnuteqarsimasoq akuerineqarpoq.
Oktobarip arfineq-aappaanniit 13-at ilanngullugu festivalertoqassaaq, kalaallit nunanillu allaneersut aliikkusersuisartut 250-it ulluni sapaatip akunnerata ingerlanerani sammisassaqartitsillutillu, isiginnaartitsillutillu, tusarnaartitsillutillu, kulturimut tunngasunik oqallitsitsissapput allarpassuarnillu sammisassaqartitsissallutik.
Erinarsoqatigiit aningaasaliiffigineqarput
Nordisk Koncertkor 100.000 koruuninik qinnuteqarsimavoq, tussiaqattaarluni tusarnaartitsineq ”Mellem himmel og hav mødes” naammassisinnaajumallugu. Tusarnaartitsinissaq pissaaq oktobarimi kulturfestivalertoqarnerani, Issittumi Sakkutooqarfiup nakkutilliiaartorluni umiarsuaataani.
Erinarsoqatigiit 34.000 koruuninik aningaasaliiffigineqarput, ataatsimiititaliap nalilermagu tusarnaartitsinerit marluk erinarsoqatigiinnut taama akisutiginavianngitsut.
Nunani tamalaani katersugaasiviit ulluat
Nuummi Eqqumiitsulianik Saqqummersitsivik 26.000 koruuninik taperneqarnissaminut iluatsitsivoq, taamaasilluni “nunani tamalaani katersugaasiviit ulluata ingerlanneqarnissaanut kingornalu ulluni 18. maaji – 31. juuli 2019-imi saqqummersitsinissaq takutitsinissarlu” ingerlassinnaalissallugit. Najukkami ataatsimiititaliap neriuutigaa neriuutigalugulu Nuuuk suliniutikkut nunat tamat akornanni ilisimaneqalissasoq.
Meeqqanut atuartunut isiginnaagassiaq
Isiginnaagassiaq meeqqanut 1. klassiniit 3. klassinut atuartunut tulluarsarneqarsimasoq – ”Uanga Timera” – Nuummi meeqqat atuarfiini tamani takutinneqarnissaanut 100.000 koruuninik aningaasaliisoqarpoq. Qinnuteqartut 200.000 koruuninik qinnuteqarsimagaluarput. Meeqqanut Atuarfeqarnermullu Ingerlatsivik suliniummut suleqataassalluni nalunaaruteqassappat suliniummut 100.000 koruuninik najukkami ataatsimiititaliaq tapiissuteqartoqassaaq.
Tamat oqartussaanerat oqaluuserineqarpoq
Tamat oqartussaanerannut suliniummut “Law Shifters”-imut 60.000 koruunit aningaasaliissutigineqarput, suliniut ukiup affaani kingullermi ingerlanneqassaaq. Suliniummi inuusuttut “naalakkersuinikkut isummanik oqallitsitsinermik pilersitsisarpoq, ileqqorinnissamut isummanik, naapertuulluartumik misiginissamut, eqqartuussisimanerit ilumoortut eqqartuussivigeqqittarlugit inatsisissanik nutaanik allannermikkut, ullumikkut piviusumik inuuneq peqataaffigisartik eqqarsaatigalugu”.
Uku itigartinneqarput
Sisorarfiit nutaamik illiniliutitaarnissaminnut aningaasannanngitsoorput.
Sermersooq Business Council suliniummut – Chefs in Residencel – Nuummi Islandillu kangiani igasunik avitseqatigiinnikkut nerisassat najugaqarfinnilu nerineqartartut pillugit avitseqatigiittoqarnissaanut, taamatullu nutaanik misiliinissamut suliniut pillugu 170.200 koruuninik qinnuteqarnera aamma itigartinneqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...