NTK: Piumasaqaatit sakkukillineqarpata KNR-ip uppernassusaa innarlerneqassaaq

Takuuk: Iluarsiissut - ilanngutassiami siusinnerusumi allassimavoq siunnersuut akuerineqarniarpasittoq - tamanna eqqortuunngilaq, amerlanerussuteqartut siunnersuut Inatsisartuni suliarineqarmat akerliummata.

Demokraatit siunnersuutigisimavaat, KNR-ip aningaasalersorneqarsimasunik nutaarsiassanik maannakkorpiarlu soqutinartunik aallakaatitsisarsinnaanissaa anguniarlugu inatsit sakkukillineqassasoq.

Siunnersuut Nunatsinni Tusagassiuutilerisut Kattuffiannit (NKT) nuannarineqanngilaq, isumaqaramik siunnersuut KNR-ip uppernassusianut tve-qarfiillu mikinerit aningaasaqarnerannut ajoqutaassasoq.

- NTK-mi isumaqarpugut, KNR avataaniit sunnerneqarani nutaarsiassanik aallakaatitsisariaqartoq, aningaasaliisunit sunnerneqanngilluinnarluni.

Annertunerusunik aningaasaliiffigineqartariaqartoq

- Illuatungaatigut KNR Aningaasanut Inatsit aallaavigalugu annertunerusumik
aningaasaliiffigineqartariaqarpoq. KNR avataaniit aningaasaliisartut radioqarfigissanngilaat tv-qarfiginagulu, NTK-mi siulittaasoq Bia Andersen Broberg tusagassiorfinnut nalunaaruteqarnermi allappoq.

Naalakkersuisut akissuteqaamminni nalunaarutigaat, aningaasalersorneqarsimasunik nutaarsiassanik maannakkorpiarlu soqutinartunik aallakaatitsisarnissamut inerteqquteqarnermi KNR-ip uppernassusaata apeqquserneqartannginnissaa siunertaasoq.

Naalakkersuisulli Demokraatit siunnersuutaannut tapersiisimapput, partiip siunnersuutigisimammagu aallakkaatitsinissaq sioqqullugu KNR aningaasaliissuteqarsimasut pillugit ilisimatitsisarnissamik piumasaqarfigineqartassasoq.

NTK: Sakkukilliliineq akuerineqarsinnaanngilluinnarpoq

NTK-milli tamanna naammagineqanngilaq:

- Nunatsinni Tusagassiutilerisut Kattuffiat (NTK) isumaqarpoq, piumasaqaatinik sakkukilliliinissaq KNR-ip uppernassusaanik innarliissasoq, aamma aningaasaliinikut kikkuunerat taaneqaraluarpalluunniit. Ilimanarluinnarpormi aningaasaliisartut KNR-imiit pitsaasumik pineqartassasut, suli aningaasanik tunniussiniassammata. Ooriuteqaruit pitsaasumik eqqartorneqarnissat pisiarisinnaavat. Taamaattoqarnissaa
akuerineqarsinnaanngilluinnarpoq, Bia Andersen Broberg oqarpoq.

Taassuma Sermitsiaq.AG-mut ilanngullugu oqaatigaa, KNR assersuutigalugu Nunatsinni angalanissamut aningaasaliissuteqartartunit aningaasaliiffigineqarluni angalasalissappatm najukkani tv-kkut aallatitsisartut ajornartorsiornerulissasut.

- KNR angalanerusalernissamut periarfissinneqassaaq, taamalu tv-qarfiit mikinerusut aallakaatitassiassanik KNR-mut tunniussiniartarnerat ajornarnerulissalluni, Bia Andersen Broberg naliliivoq.

Itigartitsissutigineqassasoq

Siunnersuut Inatsisartuni pingasunngormat suliarineqarmat Inatsisartuni amerlanerussuteqartut akerliusimapput. Siunnersuut ataatsimiititaliamut ingerlateqqinneqanngilaq, taamatulli isikkoqartillugu aappassaanik suliarisassanngortinneqarluni.

Tassan partiit oqaaseqaataat naapertorlugit itigartitsissutigineqartussat isikkoqarpoq.

Naalakkersuisut siunnersuummik nalilersueqqaaramik allannguutissatut siunnersuuteqarsimapput, tassani inatsimmik allannguinerup kinguneqaatissai pillugit nassuiaasioqqaartoqarnissaa siunnersuutigineqarluni.

Nassuiaat suliamut atatillugu soqutigisallit peqatigalugit suliarineqartussaasimavoq. Allannguutissatulli siunnersuut kingusinnerusukkut tunuartinneqarpoq, tassunalu paarlaallugu Naalakkersuisut Demokraatit siunnersuutaannut tapersiisimallutik.

Demokraatit Inatsisartuni gruppiata inatsimmik sakkukilliliinissaq siunnersuutigisimavaat, partii isumaqarmat, innuttaasut malittarisassat pissutigalugit ilisimasassanik pingaarutilinnik annaasaqartartut. Malittarisassat KNR-ip nutaarsiassiinissamut periarfissaanut akorngutaapput, partii isumaqarpoq.

Partiimit innersuussutigineqarpoq, radiukkut tv-kkullu aallakaatitsisarneq pillugu inatsimmi takuneqarsinnaareersoq aallakaatitassiat aningaasaliissuteqarfigineqarsimanermit sunnerneqassanngitsut.