NSP sisorarluni pissartanngorniutsitsinissamut piareertoq

Ulluni kingullerni sila kiannerusimagaluartoq, taamaattoq Nuummi sisorarfissat suli aputeqarluarput. Nuummi sisorarluni pissartanngorniutsitsinissat arfininngorpat aallartissapput.

Sisoraatit pujassarneqassapput. Sisorarluni pissartanngorniunnerit Nuummi arfininngornermi 11. marts aallartilerput.

Nuummi silap kissassusaa sisorarlunilu ujakkaartarfiit nakkutigeqqissaarneqarput.

Sisorarlutik unammisussat ulluni tullerni Nuummut tikerartussanngorput. Sisorarluni nunatsinni pissartanngorniunnerit Nuummi 11.-15. marts ingerlanneqassapput.

Piareersaanerillu ingerlalluartut, aaqqissuisuni ataqatigiissaarisoq ilisimatitsivoq.

- Sila suli kialaaraluarpoq, ujakkaartarfiilli ajunngeqaat. Sila maannatut iinnassappat, pissartanngorniunnermi ujakkaarfiusussat atorsinnaalluarput, Martin Møller Sermitsiaq.AG-mut oqaluttuarpoq.

Nuummi ullut kingulliit kiannerusimavoq, arfininngornermi 15,2 gradenik kiassimalluni. Taamaattumillu aput aamma aakkiartupallassimavoq. Ulluni tullerni issilaassaaq, Nuummilu pissartanngorniutsitsisoqarnerani issisiut 0 ataatilaaqqassavaa, issinneruleriartorlunili.

Immikkut ittumik ukioq manna akuerineqartut

Pissartanngorniunnissamut peqataasussat 164-it nalunaarsimapput, sisorartartut klubbii arfinillit peqataatitaqassallutik. Peqataasussat arlallit unammiuaarnerit nalaanni illoqarfimminni klubbimi ilaasortaagaluarlutik, pissartanngorniunnermi ukioq manna Aasianni Sisorartartut Peqatigiiffiat, ASP, sinnerlugu pissartanngorniunnissamut peqataasussatut immikkut ittumik akuerineqarsimapput.

Tamassumunnga pissutaavoq ujakkaartartut ataatsimiititaliaanut sisorartartut ASP-mi sisorartartuusimasut, maannali allani klubbeqartut, ASP sinnerlugu unammeqataanissamik qinnuteqarsimanerat.

- Peqataasussat arlallit ASP-iussaagut, naak allani klubbeqaraluarluta. Pissartanngorniunnermi kisimi immikkut ittumik ASP-iussalluta qinnutiginikuuarput. Tamassumunnga pissutaavoq sungiusaasorisimasarput, tapersersorterput unammeqatigisarsimasarpullu, Hans Rafaelsen, ASP-iusimasoq, ataqqillugu takutitsivigerusukkatsigu, Martin Møller Sermitsiaq.AG-mut oqaluttuarpoq.

Nuummi sisorarluni pissartanngorniunnerit siuliisa ilaanni aputaasannera pissutigalugu Quassussuup qaavani pissartanngorniutsitsinerit ingerlanneqartariaqartarsimapput. Maannali taamaaliortoqartariaqalernissaa naatsorsuutiginagu, Martin Møller oqarpoq.

Pissartanngorniunnerit pilersaarutigineqartut:

  • Arfininngorneq 11. marts: Klassisk
  • Sapaat 12. marts: Sprint
  • Marlunngorneq 14. marts: Marlukkaarluni klassisk
  • Pingasunngorneq 15. marts: Takisuumut unammineq

Ukioqatigiiaartut unammisussat malillugit takissutsit aalajangersarneqarsimapput.

Powered by Labrador CMS