NPK piumasaqarpoq: Akissarsiagut qaffassigit

Perorsaasut akissarsiaat sulinermilu atugassarititaat pillugit isumaqatiginninniarnerit suli ingerlapput. NPK maanna tamanut ammasumik piumasaqarpoq.

Filmiliuutit immiussissutillu ikumatillugit perorsaasut akissarsiassaat pillugit oqaatsit tusaruminartut aninneqartarput. Soorlu NPK-p ilaasortaasa aaqqissugaannik qaammat kingulleq akerliussutsimik takutitsisoqarmat taamaattoqartoq.

Namminersorlutilli Oqartussat NPK-lu isumaqatiginninniartussanngorlutik matut matugaangata, oqaatsit allarluinnaat aninneqartarput.

NPK-mi siulittaasoq Aningaasaqarnermut Naalakkersuisumut Vittus Qujaukitsumut (NQ) ammasumik allagaqarfigalugu piumasaqarpoq:

- Aningaasarsiavut kinguussaasut malunnaatilimmik qaffaavigisigit. Naluneqanngitsutut Perorsaasut akissarsiaannik qaffaasoqarnissaanut oqaatsit tusaajuminartut isumalluarsaarinerillu pereersimalerput. Kisianni ajoraluartumik Naalakkersuisuniit piviusorsiortumik alloriartoqarnissaanut piumassuseqartoqarnersoq takusinnaanngilarput, NPK-mi siulittaasoq Arnaq Brønlund allakkani ammasuni allappoq.

Sermitsiaq.AG-mut oqarpoq allakkat ammasut politikerinut tamanut sammisinnaasulluunniit. Politikerimmi arlallit perorsaasut akerliussutsimik takutitsineranni akissarsiat pillugit oqarluartaarput.

- Perorsaasut pitsaalluinnarnerat tamanit oqaatiginiarneqarpoq. Akissarsiat qaffanneqarnissaannut neriorsuutit imaaginnavissut tusaavagut. Maannakkumulli Namminersorlutik Oqartussat killilikkamik neqeroornerat allanngorsimanngilaq, Arnaq Brønlund oqarpoq.

Kinguaariit tullii utaqqipput

Nunatsinni Perorsaasut Kattuffiani siulittaasoq nassuiaavoq NPK-mi ilaasortat ilaat soraarninngortussanngulersut. Kinguaariillu tulliisa perorsaasussaat pilerisaarneqarnissaat pisariaqarsorineqarpoq.

- Inuusuttut, ilinniakkaminnik naammasseqqammertut pisariaqartinneqarput, perorsaasut utoqqalilersut soraarninngorneranni ingerlatseqqittussanik. Akissarsiat ineriartornermut malinnaanngippata, qanoq ililluta perorsaasutut ilinniarnissaq soqutiginarsassagatsigu qanoq ilillutillu perorsaasut meeqqerivinni sulilerusussagamik, Arnaq Brønlund aperivoq.

Ulluunerani paaqqinnittarfinni ilinniarsimasunik sulisoqarneq pillugu Naalakkersuisut periusissiaat pilersaarutaallu ilaatigut inerniliussaqarpoq perorsaasut ilinniarsimasut naammattut pigineqartut. Ukiunili tullerni perorsaasutut ilinniakkamik naammassinnittut ikiliartulersinnaanerat naatsorsuutigineqarpoq:

- Siunissaq eqqarsaatigalugu perorsaasutut ilinniakkamik naammassinnittut ukiumut 24-t 27-llu akornanniissangatinneqarpoq. Ilinniakkamik naammassisartut 2040-p tungaanut ikiliallassangatinneqarput, allassimavoq.

Isumaqatiginninniarnerit malinnaavigaat

NPK-mi siulittaasoq ilisimatitsivoq Inatsisartut aningaasanut inatsimmik suliaqarnerat qanimut malinnaavigigitsik.

- Inatsisartut silataanni oqarluartaanginnarsinnaanngillat, matullu matuppata puiguinnarneqarluta. Malinnaavugut, Arnaq Brønlund oqarpoq.

Akissarsianut isumaqatiginninniarnerit nikerianngippata NPK-mi ilaasortaasut arlallit suliumajunnaarnissamik oqariartuuteqartarsimapput. NPK-p siulittaasua oqarpoq suliumajunnaarnissaq kattuffimmit maanna kissaatigineqanngitsoq.

Powered by Labrador CMS