NPK akissarsianut isumaqatiginninniarneq pillugu: Immitsinnut ungasippugut

Nunatsinni perorsaasut Danmarkimi perorsaasunit 8.000 koruuninik akissarsiakinnerusut, Suleqatigiissitsisunit Tillie Martinussenimit isornartorsiorneqarluni nalunaarutigineqarpoq.

Perorsaasulli akissarsiatigut malunnaatilimmik maanna qaffaafigineqarsinnaanersut, maannamut suli nalunarallarpoq.

- Uagut piumasarisagut aallaavigalugit taakkulu tunniukkumasaat malikkaanni, taava isumaqatiginninniartuusugut immitsinnut ungasippugut, Nunatsinni Perorsaasut Kattuffianni siulittaasoq, Juliane H. Tobiassen Sermitsiaq.AG-mut oqarpoq.

Isumaqatigiinniarnermi isumaqatigiissutaanngitsut suunersut oqaatigisinnaanngilai, isumaqatigiinniarnerit maanna ingerlammata.

- Oqarsinnaavunga ilaasortatta sinerissamiit sulinermut tunngatillugu nalunaarutaat aamma Namminersorlutik Oqartussat akissarsiat pillugit misissuititsisimanerat piumasaqaatitsinni tunngavilersuutigaagut, oqarpoq.

Assaat naliitsut?

Ulluunerani paaqqinnittarfinni perorsaasut amigaatigineqarnerat ukiuni arlalinni kingullerni oqallisaangaatsiartarpoq.

Namminersorlutik Oqartussat akissarsianik misissuititsinera Sermitsiaq.AG-p allagaatitigut takunnissinnaaneq atorlugu pinikuuaa. Misissuineq takutitsivoq perorsaasut ilinniartitsisunut sanilliukkaanni 21,6 procentimik akissarsiakinnerusut. Perorsaasuttaaq isumaginninnermi siunnersortinit 2.000 koruunit missaannik akissarsiakinnerupput.

Perorsaasulli akornanni akissarsiat aamma nikingapput, sumi atorfeqarneq apeqqutaalluni. Perorsaasoq meeqqat atuarfianni atorfeqaruni ulluunerani paaqqinnittarfimmi atorfeqartumit ukiumut 85.000 koruunit missaanni akissarsiaqarnerussaaq.

Akissarsiat qaffanneqarnissaat piumasarineqarpoq

Tillie Martinussenip (Sul.) neriuutigaa perorsaasut pinngitsoorneqarsinnaanngilluinnartut, akissarsiaat qaffanneqassasut.

- Perorsaasut pinngitsoorneqarsinnaanngillat, Coronap ajornartoortitsinerani sulisutut pingaaruteqarput – taaneqartartut salliullutik sulisut, taamaakkaluartorli akissarsiamikkut kinguaattooqqapput. Tamanna eqqortuusinnaanngilluinnarpoq, Tillie Martinussen tusagassiorfinnut nalunaaruteqarluni allappoq.

Tillie Martinussenip eqqaasitsissutigaa partiit tamarmiullutik Inatsisartuni ataatsimiinnerni perorsaasut akissarsiassaasa qaffanneqarnissaannik piumasaqartarsimasut, perorsaasut amerlanerusut atorfinitsinneqarnissaat anguniarlugu.

- Perorsaasut taamaalillutik inuiaqatigiinni pinngitsoorneqarsinnaanngillat; siusissukkut suliniuteqarnermi; meeqqat inerikkiartorneranni isumisiueqataasartutut asannittutut, inuiaqatigiini perorsaanermi inerikkiartornermilu pingaaruteqartutut. Naalakkersuisut immikkoortumut periusissiaanni allaqqavoq meeqqat peqqinnartumik inerikkiartornissaat tunngavilersorneqassasoq perorsaasullu amerlanerungaartut ilinniartinneqassasut. Tamanna piviusunngortinneqassappat aningaasarsiat annertuumik qaffanneqarnissaannik pisariaqartitsisoqarpoq, Tillie Martinussen allappoq.

Sermitsiaq.AG-p aningaasaqarnermut naalakkersuisoqarfik saaffigaa paasiumallugu akissarsiat malunnaatilimmik qaffanneqarnissaannut suliniuteqartoqarnersoq, sulili akissutisinani.