NP-mi nalunaarusiortartoq peqqissuseq, ineriartorneq meeqqallu atugaat pillugit misissuiniartoq
NP-imi immikkut ittumik nalunaarusiortartoq Kalaallit Nunaanni nunap inoqqaavisa pisinnaatitaaffiinik misissuissaaq
NP-mi nunat inoqqaavisa pisinnaatitaaffiinik immikkut ittumik nalunaarusiortartoq Victoria Tauli Corpuz martsip qaammataani Kalaallit Nunaannut misissuijartussaaq. NP-mi inuit pisinnaatitaaffiinik suliniaqatigiiffik nittartakkamini taamatut allappoq.
Taassuma nunat inoqqaavisa pisinnaatitaaffiinik illersuinerup siuarsarneqarnissaa, ingerlatseriaatsip pitsaasup assersuutaanik katersuinissaq kiisalu pisinnaatitaaffinnik malinninniarnermi unammilligassanik tikkuussinissaq suliarissavai.
Victoria Tauli Corpuz, suut erseqqinnerusumik misissussanerlugit, suliniaqatigiiffinnit suliassamullu atatillugu susassaqartunit allanit isumassarsiorfiusinnaasunik maannangaaq ujaasilereerpoq. Pingaartumik silap pissusaata allanngoriartornerata sunniutai, Namminersorlutik Oqartussat, ineriartorneq, peqqissusseq kiisalu meeqqat inuusuttullu inissisimanerat pillugit paasissutissat soqutigilluinnarpai. Suliassaanulli atatillugu allanik siunnersuuteqartoqarsinnaavoq.
Paasissutissat Victoria Tauli Corpuzimit pissarsiarineqarusuttut:
Nalunaarusiat misissueqqissaarsimanerillu nutaat, suliassaanut naapertuuttut.
Suliassaanut atatillugit politikkit, pilersaarutit inatsisillu pillugit paasissutissat.
Suliaqarfissaani immikkut ittumik ernummatigineqartartut.
Sumiiffiit ornittariaqangai pillugit siunnersuutit.
Suliniaqatigiiffinnut attaveqaatit pillugit paasissutissat, aamma nunami sumiiffinni assigiinngitsuni attaveqaatit pillugit paasissutissat.
Nunatsinniissaaq martsip qulinganiit 19-ianut.