NP-ip silap pissusaa pillugu oqaaseqaatissaanut nunatsinnit peqataasoqartoq

Naalagaaffiit Peqatigiit meeqqanut ataatsimiititaliaanut Naliginnaasumik ilassutigisassaannut nunarput sunniuteqaqataavoq.

Maya-Natuk, 16-inik ukiulik Children's Advisory Team-mi ilaasortaasoq aperineqartuni 7.416-ini ilaavoq. Taanna silap pissusia piujuaannartitsinerlu pillugit apeqqutini Meeqqanut ataatsimiititaliamut akissuteqartunut ilaavoq.

Akissutit Naalagaaffiit Peqatigiit Naliginnaasumik ilassutigisassaannut no. 26-imut ilanngunneqassapput.

- Maya-Natuup apeqqutini pingaaruteqartuni inuunitsinnut meerartatsinnullu annertuumik sunniuteqartunut Kalaallit Nunaat sinnerlugu peqataanera assorsuaq tulluusimaarutigaarput. Meeqqat inuusuttuaqqallu misissuinermi peqataasimasut tamaasa maanna tusaassallugit pisussaaffigaarput, UNICEF Kalaallit Nunaanni ingerlatsisuusoq, Maliina Abelsen tusagassiorfinnut nalunaaruteqarluni oqarpoq.

Misissuinerup takutippaa aperineqartut 88 procentii isumaqartut silap pissusiata allanngoriartornerata peqqutigisaanik siunissami meeqqat kinguaariit ulorianartorsiortinneqassasut.

Inerniliussat pingaarnerit tassaapput:

• Aperineqartut 35 procentii isumaqarput silap pissusiata allanngoriartornerata peqqutigisaanik inuuneq imaluunniit inuuffigisaq allannguuteqarsimasoq
• Aperineqartut 63 procentii isumaqarput meeqqat inersimasunit annertunerusumik silap pissusiata allanngoriartorneranit sunnerneqartut
• Aperineqartut 88 procentii isumaqarput silap pissusiata allanngoriartornerata peqqutigisaanik siunissami meeqqat kinguaariit ulorianartorsiortinneqassasut

Kissaatit saqqummiunneqartut

Naalagaaffiit Peqatigiit ataatsimiititaliaanit meeqqat oqariartuutaat aallaavigalugit silap pissusia pillugu naliginnaasumik ilassutissaliussapput. Meeqqanut ataatsimiititaliap meeqqat pillugit isumaqatigiissutit atuuttut nunanit tamalaanit malinneqarnersut ilaatigut nakkutigisarisarpaat.

Silap pissusia piujuaannartitsinerlu pillugit isummernernit nalunaarusiaq meeqqat kissaataannik arlalinnik imaqarpoq.

Meeqqat inersimasunit kissaataat:

• Avatangiiseq minguitsoq peqqinnartorlu
• Silap pissusiata allanngoriartornera akiorniarlugu suliniarnermi tusaaneqarnissaq sunniuteqarnissamilu pingaartinneqarnissaq
• Nunarsuarmioqatigiit inuuffigineqartuniillu tamanit killeqarfiit akimorlugit suleqatigiinnissaq
• Avatangiiseq silallu pissusiata allanngoriartornera pillugit ilinniartitsinerit eqqummaariffigineqarlutillu annertusineqarnerat
• isummanik paarlaasseqatigiissinnaanermut aaqqiissuteqarsinnaanermullu inissaqartinneqarneq

Meeqqat 7.416-it nunanit 103-neersut apeqqutinik akisassanik akillutik peqataatinneqarsimapput.