Novemberimi atuarneqarnerpaat
Coronap tunillaassuunneranut tunngasut atuartartut novemberimi atuarnerusimavaat. Aammali Kommuneqarfik Sermersuumi pisortaanerusimasup politiinut tunniunneqarneranut tunngavilersuutit pillugit allaaserisaq atuarneqangaatsiarpoq.
Oqartussat arfininngornermi 20. november nalunaaruteqarput angut utoqqaq, coronamik tunillatsissimasoq, toqusoq. Nunatsinni tamanna tupassutigineqangaatsiarpoq.
Pineqartoq Upernaviup Peqqissaaviani uninnganermini tunillatsissimasoq paasineqarpoq. Innuttaasunik misissuigasuarnermi paasineqarpoq inuiaqatigiinni tuniluuttoqangaatsiartoq. Upernavimmi, 1.100-nik innuttaqartumi, innuttaasut 100-t sinneqartut tunillatsissimasut piffissap sivikitsuinnaap ingerlanerani paasineqarput.
Novemberimi allaaserisaq atuarneqarnerpaaq angutip utoqqaap, coronamik tunillatsissimasup, arfininngornermi 20. november toquneranut tunngasuuvoq.
1. Angut utoqqaq coronamik tunillatsissimasoq toqusoq
Atuarneqarnerpaat tulliattut inissippoq Kommuneqarfik Sermersuumi pisortaanerusimasup Lars Møller Sørensenip aamma ingerlatsivimmi pisortaasimasup Hans Henrik Winther Johannsenip politiinut tunniunneqarneranut tunngavilersuutit pillugit allaaserisaq. Tunngavilersuutigineqarsimavoq isumaqatigiissut milliuunilikkaanik nalilik.
Sermitsiaq.AG 19. novemberimi allaaserisamik saqqummiussaqarpoq kommunip pisortarisimasaa suliffeqarfimmut apeqqusernarsinnaasumik isumaqatigiissuteqarsimasoq, suliassanullu suliarineqarsimanngitsunut akiliisitsisarsimasoq.
Lars Møller Sørensen aamma Hans Henrik Winther Johannsen tamarmik oqarput unnerluussutit uppernarsaatissartaqanngitsut.
2. Miliuuninik nalilinnik isumaqatigiissuteqarsimasoq politiinut unnerluutigineqartoq
Atuarneqarnerpaat pingajuattut inissippoq Nuummi Upernavimmilu killilersuutit nutaat atuutsilerneqarneranni allaaserisaq. Illoqarfinni taakkunani tunillaassuuttoqarujussuarnera pissutigalugu killilersuutit ilaatigut pisortat suliffeqarfiutaanni sumiluunniit aamma illoqarfiup iluani angallatini qanermut assiaquteqartussaanerit atuutsilerneqarput. Ilanngullugulu aalajangerneqarluni pisortat suliffeqarfiutaannut iserniartilluni coronamik tunillatsissimannginnermut uppernarsaat naammakkunnaartoq. Tamanna isumaqarpoq meeqqat 2-12-inik ukiullit assersuutigalugu cafenut timersortarfinnullu iseqqusaajunnaarallarneri.
Nalunaarut killilersuutinut tunngasoq 20. november saqqummiunneqartoq 5. decemberip tungaanut atuutsussanngortinneqarpoq.
3. Nuummi Upernavimmilu killilersuutit nutaat