Notre Damep sanaqqinneqarnissaanut milliardilikkaanik aningaasaliisoqarpoq

Aningaasat 1 milliardit dollaringajaat Parisimi oqaluffissaarsuup Notre Damep, ataasinngormat ikuallarujussuartup, sanaqqinneqarnissaanut tunissutigineqarput. Nutaarsiassaqartitsivik AP taama allaaserisaqarpoq.

Oqaluffissaarsuaq ataasinngormat ikuallappoq, aseruatitingaatsiarlunilu.

Oqaluffissaarsuup, Frankrigip oqaluttuarisaaneranut pingaaruteqaqisup, sanaqqinneqarnissaa pilersaarutigineqartoq, Frankrigip præsidentiata Emmanuel Macronip ataasinngormat oqaatigaa.

Sanaqqinneqarnissaali akisoorujussooratarsinnaavoq. Sivisusinnaassaarmi, atortullu immikkuullarissut, piginnaasallu aamma immikkuullarissut pisariaqartinneqartariaqassapput.

Inuilli arlallit suliniummut ikiuiniarlutik milliuunilikkuutaanik aningaasaleeqataapput.

995 millionit dollarit - tassa 6,5 milliardit koruunit sinnerlugit - pingasunngornermi ullaap tungaani katersorneqareersimapput. Præsidentip kulturikkut eriagisassanut tunngasunut oqaaseqartitaa Stephane Bern Frankrigimi radiomut France infomut taama oqarpoq.

Oqaluffissaarsuaq ikuallammat sanaqqinneqarnissaanut aningaasaliiniat aqaguani nalunaareerput, aningaasaatilissuit arlallit nalunaarlutik.

Suliffeqarfiutilik Bernard Arnault taakkununnga ilaavoq. Taanna 200 millionit Euronik, imaluunniit 1,5 milliardit koruunit missaannik, aningaasaliiniarpoq.

Taassuma saniatiatigut Apple, L'Oréal, katuullit inuillu allat nunarsuatsinneersut aningaasaleeqataapput.

Oqaluffissaarsuup ukiunik 850-inik pisoqaassusillip suna peqqutigalugu ikuallalersimanera suli paasineqanngilaq.

Ikuallattoqarneranullu suna peqqutaanersoq ikuallattoqarasimaneranik paasiniaasartut paasinialeruttorpaat. Oqaluffiullu nutarsarneqarneranut atatillugu ajutoortoqarsimasinnaanera pasineqarpoq.