Norskit umiarsuaat uuliamik usisaat saassunneqareerluni ikuallattoq
Norskit aamma tyskit umiarsuaat uuliamik usisaataat Omanip kangerliumarngani saassunneqarput
Umiarsuit uuliamik usisaatit marluk, ataaseq norskinit pigineqartoq aappaalu tyskinit pigineqartoq, Omanip avataani saassunneqarnermi kingora qimagussortitsiffigineqarput.
Norskit nutaarsiassaqartitsiviat NTB naapertorlugu umiarsuaq uuliamik usisaaat ”Front Altair”, Frontlinemit pigineqartoq, Omanip kangerliumarngani ikuallalersimavoq. Nutaarsiassaqartitsiviup AFP-p oqartussaq oqaatigineqanngitsoq issuarlugu allappoq,q ”Front Altair”-imi pingasoriarluni qaartoqarsimasoq.
Iranmiut nutaarsiassaqartitsivianit nalunaarutit akerleralugit ”Front Altair” umiarsuaatileqatigiiffik Frontline naapertorlugu kivisimanngilaq. Iranimiut nutaarsiassaqartitsiviata Irnap umiarsuaq kivisimanerarlugu ilisimatitsinerata kinguninngua umiarsuaatileqatigiiffik itigartitsivoq.
Umiarsuup aappaata piginnittua, Bernhard Schulte GmbH & Co., umiarsuaq uuliamik usisaat "Kokuka Courageous" saassunneqarsimarpasippoq.
Tusagassiorfik Bloomberg naapertorlugu Bernhard Schulte GmbH & Co. ilisimatitsivoq,
umiarsuaq timitamigut immap killingata qulaani putoqartoq.
- "Kokuka Courageous" suli tassani sumiiffimmiippoq, kivinissamullu ulorianartorsiorani. Usisaa metanol ajunngilaq, umiarsuaatileqatigiiffimmi oqaaseqartartoq taama oqarpoq.
Umiarsuit taakku marluk Omanip kangerliumarngani Hormuzstrædetip eqqaaniipput. USA-p sakkutuuisa umiarsuaat nunap immikkoortuaniittoq naapertorlugu, umiarsuarni inuttat qimagussortinneqarsimapput.