Norsaq: - Tunumi aalisagartassiissutinik tunineqarnissarput soorunami neriuutigaarput

Taama aalisartitseqatigiiffimmi mikisumi Norsami, avataasiortunut saarullittassiissutinik amerlasuunik pissarsiniarnermi Tuukkaq Trawlimut unammillertumi, pisortaq Jens Peter Larsen, oqarpoq.

- Umiarsuarmik pisitinnata Naalakkersuisunit Tunumi avataasiortunut saarullittassiissutinik tunineqartariaqarpugut. Pisassiissutinik tunineqartut uaguussaasut soorunami neriuutigaarput, Norsap pisortaa, Jens Peter Larsen, Sermitsiamut oqarpoq.

Aviisi Sermitsiaq taama allappoq.

Ukioq manna februaarip naanerani Air Greenlandip timmisartorsuaq Airbus A330, Norsaq ateralugu timmisartuutileqatigiiffimmut ukiut 20-t sinnerlugit kiffartuussisimasoq, inuulluaqquaa.

2022-mi juullinngitsiartoq ingerlatseqatigiiffik anpartsselskabi Norsaq pilersinneqarpoq. Kalaallit Nunaanni aalisartitseqatigiiffeeraq qulinik piginnittulik ingerlatseqatigiiffik aningaasaqarnikkut tunngavissarissaartoq aktieselskabi Tuukkaq Trawl, Carl Christensenimit aamma Royal Greenlandimit pigineqartoq naligalugu Namminersorlutik Oqartussanut pisassiissutinik qinnuteqarpoq. Ingerlatseqatigiiffinnut nutaanut marlunnut Tunumi aamma Kitaata kujataani saarullinnut 7.515 tonsinut suluppaakkanullu 406 tonsinut akuersissummik pissarsiniarnissaq anguniagaavoq.

Qinnuteqarnissamut killiliussaq marsip 31-ani naareerpat pisassiissutit aalisartitseqatigiiffimmut nutaamut Kalaallit Nunaanni nalunaarsorsimasumik angallataatilimmut tunniunneqarnissaannik Naalakkersuisut siunertarput. Naalakkersuisut ingerlatseqatigiiffimmut pisassiissutinik tunniussaqassanngillat, ingerlatseqatigiiffik ukiumi ataatsimi aningaasaqarnikkut piujuartitsisumik aalisarnermik qulakkeerunneqarsinnaanngippat. Piumasaqaatit taamaapput.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS