Norsaq missinnaasimanngitsoq
Imarpik ikaarlugu timmisartoq marlunngornermi Kangerlussuarmut missinnaasimannginnami Københavnimut utersimavoq.
Norsaq anorip sammiviata ajornartorsiutaanera pissutigalugu marlunngornermi Kangerlussuarmut missinnaasimanngilaq.
Taamaattumik Københavnimut uterpoq, aqqutaanilu Keflavikimi orsersorluni.
Air Greenlandimit Facebookikkut taamatut ilisimatitsissuteqartoqarpoq.
Timmisartuutileqatigiiffik ilanngullugu allappoq, silap ulluni makkunani ajoqattaarneratigut silaannakkut angallassiniarnermi ajornartorsiuteqartoqartoq.
- Ilaasut eqqugaasullu tamarmik angalanissaanut tunngatillugu nutaamik aaqqissuussiffiginiarlugit ulappuppugut, ullullu ingerlanerani angalanissamut pilersaarutit nutaat ilisimatitsissutigineqarumaarput. Una ilisimatitsissut uggornaraluartoq, tamassi inuiattut ullorsiorluarnissassinnik kissaappassi, Air Greenlandimit allapput.
Ataasinngornermi aamma silarlunnera pissutaalluni silaannakkut angallassiniarneq ajornarsimavoq, Air Greenlandimiillu ilaasussat timmisartunut allanut nuunneqartariaqarsimallutik.