silarluk
Norsaq Kangerlussuarmi unikkallarpoq
Kangerlussuarmiit Danmarkimit ilaasut sisamanngornermi utaqqimmesortariaqalerput
Air Greenlandip timmisartorsua Norsaq Kangerlussuarmi unikkallarpoq silap ersinngippallaarnera pissutigalugu. Maanna Kangerlussuarmiit Danmarkimut aallarfissarilerpaa tallimanngornermi ullaassakkut nalunaaqutaq 04.00.
Kangerlussuarmi ukiup ingerlanerani qaqutigorsuaannaq pisartoq sisamanngornermi pivoq, tassa timmisartorsuaq aallarsinnaanngikkallarmat silap ersinngippallaarnera pissutigalugu. Isikkiviginnerulernissaa Air Greenlandimit utaqqeqqaarneqaraluarpoq.
- Silap isikkivilunnerujussua pissutigalugu piffissaq eqqorlugu Kangerlussuarmiit aallarsinnaasimanngilaq, inatsisillu malillugit inuttat piffissap suliffigisassaasa iluani sila pitsanngorianngimmat, aallarnissaa kinguartinneqarpoq, Air Greenland nalunaarpoq. Kangerlussuarmiit kalaallit nalunaaqutaat malillugu nal. 04 aallarnissaa, aammalu danskit nalunaaqutaat malillugu nal. 12.25 tikinnissaa naatsorsuutigineqarpoq, Air Greenland nalunaarpoq
Tallimanngornermi Københavnip Kangerlussuullu akornanni timmisartuussinissaq aamma eqqorneqartussanngorpoq. Timmisartorsuaq Københavnimi tallimanngornermi nalunaaqutaq 14.00 aallartussanngorpoq. Kinguaattoornerup kinguneranik Nunatsinni timmisartuussinnerit aamma eqqorneqassapput.