Norsaq inuulluaqqusilluni qujavoq
Air Greenlandip timmisartumik angallassisarnerani oqaluttuarisaaneranut ilaasoq ullumikkut sisamanngornermi naammassivoq. Tassami A 330-200 Norsaq naggataamik Air Greenlandimit qangattarpoq, Københavnip Kangerlussuullu akornanni angallassineq Tuukkamut ingerlateqqippaa.
Sineriammi silarlunnera pissutigalugu akunnernik marlunnik kinguaattooreerluni Norsaq Kangerlussuarmit naggataamik aallarpoq. Timmisartutoqqap naggataarnerata sulisorpassuit aamma Air Greenlandimi pisortaq sunnerpai.
- Timmisartut inuttulli ipput, ilai nipaarluullutik inuusarput allalli tusaamasanngortarput. Amerlanerit naliginnaasumik inuuneqartarput, allalli tamanit immikkuullarissuullutik nuannerluinnartumik kinaassuseqartarput piginnaaneqartarlutillu. Air Greenlandimi pisortaq Jacob Nitter, LinkedIn-imi taama allappoq.
Timmisartutsialak
Pisortattaaq Norsap Kangerlussuarmit qangattarneranit video ilannguppaa, tassani Nitterip oqarnera naapertorlugu timmisartup immikkuullarissuunera takuneqarsinnaavoq.
- 40 gradinik issittoq qangattarnissaq timmisartutsialassuup uuma ajornartinngilaa, taanna allappoq, nangillunilu:
- Ullumi tusaamasamik immikkuullarilluinnartumillu timmisartumik inuulluaqqusivugut, tassa timmisartuni tatiginartoq A330-200 Air Greenlandimut naggammik timmisartuussissammat. Norsaq Air Greenlandimut Kalaallit Nunaannullu timmisartutsialaasimavoq. Inuttanit ilaasuniillu iluarineqarluartoq, Norsarlu maqaasineqassaaq, kisianni tunniusimalluni ajornartorsiuteqaranilu sullissisimanera pillugu ukiuni 20-nit eqqaamasat piujuassapput.
Timmisartutoqaq atorunnaartoq
Norsaq ukiuni 25-ngajanni atuussimavoq, Grønlandsflyp Boeing 757-iutaa “Kunuunnguaq” 2002-imi taarseramiuk, taamani Air Greenlandimut timmisartuussinera siulleq novemberip 11-ani ingerlanneqarpoq.
Siulinnguanilu ukuni sisamani Belgiamiut timmisartuutileqatigiiffianut Sabena-mut sullissisimavoq.
Norsamut naggammik timmisartuussinerani Københavnimiit Kangerlussuup tungaanut aallannginnerani inuulluaqqusilluni malunnartinneqarpoq. Ilaasut ullormi tassani champagnellerfigineqarput aamma chokoladit, Kangerlussuarmilu takkuttut kaffimik kaagimillu sassaallerfigineqarlutik. Air Greenlandimit “arnaq inorortoq” inuulluaqquneqarpoq, soorlu aquttuunerup, Michael Madsenip, Norsaq novemberip 11-ani ukiuni 20-ni Air Greenlandimut sullissinera nalliuttorsiutigineqarmat, taama taagaa.
Norsaq amerlasuunik angusaqarsimavoq, aajuku ilai:
- 2017-imi maajip 4-ni Norsap aallarnerit minnerillu 10.000-ssaat anguai.
- 2022-imi junip 30-ani Norsap Air Greenlandimut timmisartuussinerni akunnerit 40.000 tiimit anguai.
- Novemberip 11-ani Norsaq Air Greenlandimut ilaasoqarluni timmisartuussisarnerminut ukiuti 20-it angullugit nalliuttorsiorpoq.
Ullumikkullu 16. februar 2023 inuulluaqquarput.