Skip to main content

Norsaq HC pissartanngorusuttoq

Assammik arsaattartut Aasianneersut marlunngormat GSS-mut ajorsaput, taamaattoq unammisartut pissartanngorniutivinnermi pissartanngornissartik sukataaruppaat

Angutit Nunatsinni assammik arsarlutik pissartanngornitivinneranni Norsaq HC Aasianneersut unamminermi siullermi ajorsarput.

Holdeqatigiit ukiuni arfineq marlunni tulleriinni pissartat GSS 30-20-mik ajorsarfigaat.

- Soorunami ajorsarnerput ugguaraarput. Ippassaq unamminitsinni pilersaaruterput pitsaanerpaasimanngilaq, pitsaanerusumilli piareersarluarsimasinnaangaluarpugut. Unamminerup immikkoortua siulleq arsarnerluffigaarput, unamminerulli immikkoortuata aappaani kukkussutigut iluarsingatsigit imminut tatiginerulersimapput, unammisartut sungiusaasuat, Tom Ostermann, Sermitsiaq.AG-mut oqarpoq.

Unammisartortitami marlunngormat unamminermit pitsaanerujussuarmik arsarsinnaanerat, taassuma qularutiginngilaa.

- Unamminerup tullissaanut piareersaatigut aallartereerpagut, taanna oqarpoq.

Assit takukkit: Assit takukkit: Assammik arsaalluni pissartanngorniunneq aallarteruttorpoq

Unammisat nukittuut

Tom Ostermannillu GSS ataqqilluinnarpai.

- Nukittoorujussuupput, sukkanerusumilli unammeriaaseqalersimallutik. Sukataartaqaat imminulli ilisarisimalluarlutik. Taakku misilittagartuujupput uangut amingaatigisatsinnik, Tom Ostermann oqarpoq.

Taanna 1999-mi Norsaq HC-mik pilersitseqataavoq tassani meeqqat inuusuttulli immikkut sammineqarsimallutik. Taakkua maanna inersimasunngornikuupput, unammisartut pitsanngornikuupput medaaliannanniuttunillu peqataasalersimallutik.

- 2011-miilli angutit inersimasut sungiusartalersimavakka. 2012-miik 2014-mut tallimaattut inissittuarsimavugut, tamannali allanngortikkusuppara tallimaattummi inissikataleqqavunga. Tamatuma kingorna unammisartut annertunerusumik piumasaqarfigaakka, pissartanngorniutivinnernilu angusarissaarnerunissaq aamma piumasaqaatigalugu. Nuannariinnarlugu assammik arsaattartuuneq tamaanga killeqartariaqarpoq.

Sungiusarnerit amerlanerit

- 2015-mi sukataarsimanerput takuneqarsinnaavoq, taamani GM-ertoqarnerani sølvinnappugut. Taamanikkumiilli sungiusartarnerput allanngortissimanngilarput. Piareersajaarsimannginnerput maanna ugguariara, Tom Ostermann qungujuppoq.

Massakkut unammisartut sungiusarfigisakkamit saniatigut timersortarfimmi sungiusartalernikkuupput.

- Suna tamaat piareersarluarnikuuarput, ileqqullu malillugit juulli kingorna aallartinnata, aasap kingorna pimoorullugu sungiusarnerit aallartissavagut. Unammisartut misilittartarpagut, aammalu unammisartut timigissartarfinni sungiusaqatigiittarlutik. Unammisakkatsinnit mikineruvugut, tamanna pissutigalugu sukkanerunissarput nukittunerunissarpulli sukataarussimavarput, Tom Ostermann oqarpoq.

Målinik illersuisartut ajornartorsiuteqartut

Qanoq iliornissaannik pilersaarusiuttaleratsigit unammisartunit nuannaarutigineqartorujuuvoq.

- Sungiusarnerit tamaasa 20-25-illu akornanniittuaannarpugut. Unammisartut inuusunnerit aamma sungiusaqatigisarpagut, siunissamut peqataasalernissaat eqqarsaatigalugit, taamaasiornikkut unammilligassat amerlanerulersimallutik. Aammalu maanna sungiusarnermi peqataasinnaanngikkaanni nalunaartittalernikuuagut. Taamaasilluta unammisartuutigut akisussaaffeqarnerulersissimavagut.

- Målinilli illersuisartut sungiusartarnerat sanngiiffigaarput. Målinik illersuinissamik qanoq sungiusaaneq pillugu holdit allat aperisimasinnaangaluarpakkat. Målinik illersuisinnaasut tallimat piareersimasuutigingaluarpagut, taamaattoq ajornartorsiutigaarput, taanna oqarpoq.

Pissartanngorusuttut

- Pissartanngorniutivinnerni suna anguniagarivisiuk?

- Ukioq manna pissartanngornissaq anguniarlugu sungiusarsimavugut. Iluatsinngitsoorutsigut pissartanngornissaq anguniarlugu sakkortuumik sungiusartarnigut ingerlateqqissavagut. Pissartanngorniutivinnerni iliuutsigut tamarmik pilersaarusiorluangaapput, aaqqittassanik eqqartuinerit unamminissamulli pilersaarusiornerit, Tom Ostermann oqarpoq.

Norsaq HC-p angutitaasa NÛK pingasunngornermi nalunaaqutaq 17:30 naapissavaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER