Norgemi qaqqarsuarmi nuna sisoorujussuartoq
Norgemi Veslemannenimi qaqqarsuup ilaani nuna sisamanngornermi unnukkut sisoorpoq. Inunnik ajoqusertoqanngilaq.
Norgemi Romdalimi qaqqarsuup ilaani Veslemannenimi nuna arlaleriarluni sisoorpoq. Norskit imermut nukissiuteqarnermullu oqartussaasui, nutaarsiassaqartitsivik NTB naapertorlugu taama nalunaaruteqarput.
Qaqqarsuaq ukiuni arlalinni allanngorartarsimavoq uninngavissanani, 2009-imilu nuna annertooq sisoornerata kingorna nakkutigineqalersimalluni.
NVE naapertorlugu qaqqap ilaa "Spiret"-imik taaneqartartoq, Veslemannenimillu napatitsisuusoq, nunap sisoornerani eqqorneqarpoq.
NVE-mi geologi Einar Anda, norskit nutaarsiassaqartitsiviat VG naapertorlugu oqarpoq, sumiiffimmi 2014-imili nunat sisoortarnerini aatsaat taama annertutigisoq.
Nunat sisoortut pingasunngornermili aallartipput, sisamanngornermili unnukkut 21.00 missaani sumiiffimmi nunatarujussuaq sisoornermit sakkortungaatsiartumit eqqorneqarpoq. Sumiiffimmi siallerujussuarnera sisoornermut pissutaasorineqarpoq.
Qaqqami sumiiffik pineqartoq uninngasuunngikkaluarluni, akunnerni 24-ni kingullerni aatsaat taama sukkatigisumik sakkortutigisumillu ingerlaartoq, NVE ilisimatitsivoq.
NVE-mi immikkoortortaqarfimmi pisortaq, Lars Harald Blikra naapertorlugu, qaqqami sumiiffik pineqartoq ullup unnuallu ataatsip ingerlanerinnaani miiterimik ataatsimik nikissimavoq.
Nunat sisoorneri annertunerusut sakkukinnerusullu 39-it piffissami tassani nalunaarsorneqarsimapput.
Nalunaarsuinermilu Nasjonalt Seismisk Nettverk (NSN) nalunaarsuingaatsiarsimavoq. Taakku sumiiffinni ungasinnerusuni, soorlu Bergenimi Trondheimimilu nunap sajunneranik aamma uuttuisinnaasimasut, VG allappoq.
- Veslemannenip aalanerani sajunnerit aatsaat taama sakkortutigisut takuagut. Siornatigut uuttornikuusimasagut sakkortunerusut, maanna uuttukkatsinnut sanilliullugit annikittuinnaapput, NSN-imi seismolog Mathilde Sørensen oqarpoq.
NVE-mi geologit naapertorlugit qaqqarsuarmi qaarsut ujarassuillu tallimanngornerup ullaavani sisoornissaat naatsorsuutigineqarsinnaavoq.
NVE-p nunap sisoornissaanut ilimasaarut “aarlerinarluinnartutut” nalilerpaa.
Horgheimimili, qaqqap qanittuani innuttaasunut najugaqartunut tamanna nutaajunngilaq. Qaqqami 2018-imi nuna arfinileriarluni sisoorsimavoq, taakkunanilu innuttaasut qimagussuutsinneqartariaqarsimapput.