Norgemi pissartanngorniunnermi Slettemarkit pingasut unammeqataassapput
Qatanngutigiit, Ukaleq, Sondre aamma Inuk Slettemark nunarput sinnerlugu Norgemi aasaanerani assakaasulinnik sisoraaserluni ooqattaasarnermut pissartanngorniunnermut ilaasussanngorput. Unamminerit marluk sapaatip akunnerata naanerani ingerlanneqassapput.
Norgemi assakaasulinnik sisoraaserluni ooqattaasarnermik sapaatip akunnerata naanerani pissartanngorniuttoqalerpat nunatsinnit sisorartartut pingasut peqataassapput.
Qatanngutigiit, Ukaleq Slettemark, Sondre Slettemark aamma Inuk Slettemark nunarput sinnerlugu peqataassasut, Grønlands Biathlon Forbund allappoq.
Ooqattaasarnermik aasaanerani pissartanngorniunneq assakaasulinnik sisoraaserluni ingerlanneqassaaq. Unamminerillu marluk qatanngutigiit peqataaffigissavaat.
Nukappissat piareersarluarsimasut
Sondre Slettemark aamma Inuk Slettemark Geilomi Norge Toppidrettsgymnasiami ilinniartuupput, sungiusarluareerlutillu pissartanngorniunnissamut peqataasussanngorlutik.
Unamminerit sioqqullugit misiliinermi nukappissat angusarissaarsimasut, Grønlands Biathlon Forbund ilisimatitsivoq.
- Marluullutik misiliinermi 6 kilometerimut isorartutigisumut, marloriarlu ooqattaanermut, peqataapput. Sondre ajugaavoq. Inuk ukioq siulleq atuaqatimini angusarissaarnerpaavoq, 2.-3. års-elevillu ilaannit aamma angusarissaarnerulluni, kattuffik ilisimatitsivoq.
Ukaleq isumalluarfigineqarpoq
Ukaleq Slettemark Norgemi pissartanngorniunnernut peqataassalluni aamma aalajangerpoq. Isikkamigut annersimagaluarluni, taamaattoq peqatimini aamma ingerlalluartussatut naatsorsuutigineqartoq, Grønlands Biathlon Forbund ilisimatitsivoq. Taanna kissassaatigalugu unamminerni siuttooqqammerpoq.
Arfininngornermi sprint ingerlanneqassaaq. Sapaammilu ataatsikkut aallarnermi aamma unammisoqassalluni.
Timersuummi pikkorissaaneq nunatsinni aamma ingerlanneqarpoq. Grønlands Biathlon Forbund ilisimatitsivoq sisorartartoq Martin Møller Nuummi ooqattaasarnermik sungiusaasartoq. Inuusuttut marluk nunat tamalaat akornanni sisorartartut Italiami oktoberimi sungiusaqatigiitsinneqalerpata, peqataasussanngorput.