Norgemi aputit sisoorneranni inuit sisamat ajunaartut

Qaqqarsuarmi apummik sisoortoqareernerata kingorna arnaq sverigemiu angutillu pingasut Finlandimeersut annassimasinnaanerinik norskit oqartussaasui ilimasukkunnaarput.

Norgep avannaatungaani pingasunngormat apummik sisoortoqarmat taakku appussaapput.

- Ilisimasaqanngilagut, misissuinernillu takussutissaqanngilaq, ulluni marlunni apussaaqqareernermi annattoqarsinnaasoq, Tromsømi napparsimmavissuarmi nakorsaaneq, Mads Gilbert, tallimanngornermi ualikkut tusagassiortunik katersortitsinermi oqarpoq.

- Taamaammat qularinngilarput inuit sisamat sisoortoqarnerani ajunaarsimassasut, nangippoq.

Norgep avannaani Tromsimi inuit sisamat sisorartartuusut sisoortoqareernerata kingorna pingasunngornermi tammaaneqartutut nalunaarutigineqarput.

Oqartussaasut oqaatigaat annaassiniaalluni ujaasineq tallimanngornermi ualikkut allanngortinneqartoq, ajunaarsimasunik ujaasininngortinneqarluni.

Aalajangernermut tunngavigineqarpoq sumiiffinni marlunni sisoortoqarneranik nalunaarutinik takunnittoqarsimammat, taamaattumillu apummik sisoortoorneq annertusimalluni.

- Tamassuma qulakkeerpaa ujaarisagut appussaasimassasut. Aputit sisoorneranit akunnerit 38-t qaangiutereerput, Tromsimi politimesteri, Astrid Nilsen, ullumi oqarpoq.

Aputit sisoornialerneranik kalerrisaarutit nalunaarnerat paasineqarpoq ambulance qulimiguulik qanittuani Blåbærfjeldemiitillugu.

Ujaarineqartut tassaapput arnaq sverigemiu angutillu pingasut Finlandimeersut, taakku Blåbærfjeldemi angalaarsimapput. Kingullermik takuneqarput pingasunngornermi ualikkut marluk missaanni.

Angalatitsivimmi sulisoq akunnialuit qaangiummata politiinut kalerriivoq.

Ujaarineqartut sisamat Lyngenimi sermikkut qaqqasiornermut pikkorissaqqaarsimapput, kingornalu Tamokdalenip tungaanut aallarsimallutik, NRK, aviisimut Hufvudstadsblademut issuaalluni allappoq.

Apummik sisoortoqaraluarpat annanniarnissamut atortunik, ujaarineqartut nassarsimanerarneqarput.