Aalisarneq
Norge nutaamik aalisarnermut isumaqatigiissuteqarfigineqarpoq
Kalaallit aalisartuisa Norgep imartaani aappaagu saarullittassaat 300 tonsinik amerlineqarput
Aalisarnermut Piniarnermullu Naalakkersuisoqarfik Kalaallit Nunaata aamma Norgep 2018-imut aalisagartassai pillugit isumaqatigiissuteqarput.
Isumaqatigiissut Kalaallit Nunaata aamma Norgep aalisarneq pillugu isumaqatigiissutaannik juunip qulingiluaanneersumik 1992-imeersumik tunngaveqarpoq. Isumaqatigiissut kalaallit Norgep imartaani 2018-imi aalisarnissaannut aamma norgemiut nunatta imartaani aalisarnissaannut tunngaviuvoq.
Nunarput 2018-imi Norgep imartaani saarullittassai 2017-imut sanilliullugit 300 tonsinik amerlineqarput, taamaasillunilu nunarput aappaagu 4.000 tonsinik saarullittassaqassaaq. Nunatta Norgep imartaani kullerinik aamma saarulliusaanik pisassaai allannguuteqassanngillat.
Norge nunatta imartaani aappaagu pisassai tupissutinik 100 tonsinik aammalu suluppaakkanik 200 tonsinik ilaneqarput.
Kalaallit Nunaata aamma Norgep 2018-imut aalisagartassat pillugit isumaqatigiinniarnerat atorfilittanit Københavnimi 12. aamma 13. decembari 2017-imi ingerlanneqarput.
Norgemik 2018-imut isumaqatigiissuteqarneq Aalisarnermut Piniarnermullu Naalakkersuisoqarfimmit aamma aalisarnermik inuussutissarsiuteqartunit naammagisimaarneqarpoq, nunatsinnut naleqartinneqaqaluni.
Namminersorlutik Oqartussat nittartagaanni agguaanerit tamakkiisut takuneqarsinnaapput, taakku ukiut ingerlanerini qanoq ineriartorsimanersut takuneqarsinnaalluni.