Maniitsoq
Nordjobberit aalisakkerivinni tunisassiornermik qulakkeereqataasut
Inuusuttut arfineq-pingasut Nunanit Avannarlerneersut aasaanerani Royal Greenlandip Maniitsumi fabrikkiani sulisussaaleqineq pissutigalugu sulipput
Illoqarfimmi sulisussaaleqineq pissutigalugu Royal Greenlandip Maniitsumi fabrikkia norjobberinik taagorneqartut arfineq-pingasut tikisinniarlugit aalajangersimavoq.
Inuusuttut 20-niit 26-t angullugit ukiullit Finlandimit, Sverigemit aammalu Danmarkimit tikisitat tunisassiorfimmi juunip 24-aniit sulilerput aggustillu tallimaata tungaanut sulissapput.
Atuaruk: Suliffissuaq sulisunik aalajaatsunik amigaateqartoq
Paarlakaajaattut
- Tunisassiorfimmi Nordjobb aqqutigalugu sulisoqarnerput maannamut iluatsilluarpoq. Inuusuttut tunisassiorfimmi sulisorilersimanngikkaluarutsigit tunisassiorfimmi sulisunik paarlakaajaatitaqarsimanavianngikkaluarpugut. Taamaammat inuusuttut ingerlalluaqaat sulinerannillu nersualaarneqartaqaat, Finn Larsen tunisassiorfimmi quersualerinermi assartugalerinermilu aqutsisoq, royalgreenland.gl-imut oqarpoq.
Inuusuttut Nordjobbimeersut tunisassiornermi assigiinngitsunik sulisinneqarput. Ilaat tunitsivimmi ullukkorsiorlutilluunniit unnukkorsiortarput, allallu tunisassiorfivittaviani ullukkorsiorlutilluunniit unnukkorsiortarput.
Suli amigaateqartut
Naak Nordjobbimeersunik ikiorteqaraluarlutik tunisassiorfimmi sulisussanik 40-nik pissarsiniarneq suli ajornartorsiutaavoq. Taamaammallu tunisassiorfimmi aqutsisut inuusuttut Nordjobbimeersut taamaatiaarnissaat uggoreqaat.
- Inuusuttut Nordjobbimeersut inissaqartinniarnerisa ajornartorsiutaanera pissutigalugu ajoraluartumik aggustip tallimaata tungaannaanut maaniissinnaapput, tamannalu uggornaqaaq, tassami sullarillutillu ullaakkut piffissaq eqqorlugu suliartortaramik aalajaatsuupput, Finn Larsen oqaluttuarpoq.
- Naak inuiaqatigiinnut piorsarsimassutsimullu takornatanut tikeraaraluarlutik sulisoralugit eqinnaaqaat ingerlalluaqalutillu. Aammattaaq nerisarfimmi akisunngitsunik nerisinnaanertik qujamasuutigaat, aqutsisoq oqarpoq.
Atuaruk: Royal Greenlandimi tunisassiorneq nutaaq unammillernartumik eqqugaasoq
Arlalinni najugaqartut
Inuusuttut kollegiami juulip 24-ata tungaanut najugaqassapput, tamatumalu kingorna illoqarfiup efterskoleani sapaatit akunnerini marlunni kingullerni najugaqarsinnaassapput.
Nordjobb inuusuttunut 18-it 28-llu akornanni ukiulinnut Nunani Avannarlerni aasaanerani suliffissanik, ineqarnermik aammalu piorsarsimassutsitigut sammisassaqartinneqarnissaannik 1985-imiilli neqerooruteqartalersimavoq. Taamaasillu Nordjobb inuusuttut sulisitsisullu sulisussaqarniarnikkut eqaatsumik peqataanissaannut periarfissiisuuvoq.