Atuakkat

Nordisk Rådip atuakkanut nersornaataanut zombie atuagaq innersuunneqartoq

Kalaallit Atuakkiortut oqaluttualiat ataatsimoortut Zombiet Nunaat nersornaammut innersuuppaat

Sørine Steenholdt atuakkiami saqqummersinneqarneranut atatillugu assilineqartoq

Kalaallit Atuakkiortut atuakkiortoq inuusuttoq Sørine Steenholdtip atuakkiaa siulleq, Zombiet Nunaat, Nordisk Rådip atuakkanut nersornaataanut 2016-mut innersuuppaa.

Allalluakkat
Peqatigiiffiup tassunga tunngatillugu erseqqissaatigaat, kalaallit atuakkiortui inuusuttut atuakkiornerup silarsuaani maanna sassaraluttuinnartut.

Maluginiagassaasorlu allalluarsimasunik, eqqarsalersitsisunik naliminni pisunik, inuiaqatigiinnullu isornartorsiuerpalaartunik atuakkiortarmata atuartuminnik tiguaalluartartunik, silarsuarmullu inuit ilarpassuisa annikitsuinnarmik ilisimasaqarfigisaannut isertitsisarlutik.

Sumiginnaaneq
- Sumiginnagaalluni imigassamillu ajornartorsiorfiujusumi alliartornerup kingunerisaanik misigissutsit sakkortoorsuit pilersinneqartarnerinut atuakkakkut Zombiet Nunaatigut silarsuarmut allarluinnarmut isertinneqarpugut. Misigissutsit arlaannaalluunniit puiorneqarsimanngilaq, qaratsamilu teqeqqunut taartunut tamanut apuussorneqarpugut, angajoqqaat imigassamik atornerluisut imminnullu naalagarsuanngortittartut meerannguup qarasaani misigissutsinut pilersittagaanut.

Atuakkiortut peqatigiiffianni siulittaasoq Juaaka Lyberth aamma siulersuisunut ilaasortaq Tupaarnaq Rosing, peqatigiiffiup innersuussinerani naqissusiipput.

Oqaluttualiat qulit
Oqaluttuaaqqat qulit sinaakkutaralugit Zombiet Nunaanni oqaluttuarineqarput, peqatigiiffiup ima oqaaseqarfigai: Allalluakkani, kamminnertalinni, nukillalaarfiusuni, ilaatigullu ima eqqortigisuni, allaat angerlarsimaffimmi ulluni amerlasuuni erngutereersimanerup tipersua merianngunartoq naamaneqarsinnaallunilusooq.

Meeraq zombiitut pissusilersulertarpoq, zombiit nunaat iserfigalugu. Takunnissinnaassutsili pigiuartarpaa.

Powered by Labrador CMS